ស្ថានទូតចិន ដាក់កំណត់ទូតអោយរដ្ឋាភិបាលកម្ពុជា រក្សាសន្តិសុខ សុវត្ថិភាព សម្រាប់ស្ថានទូត និងពលរដ្ឋចិន។
រដ្ឋលេខាធិការ និងជាអ្នកនាំពាក្យក្រសួងការបរទេស លោក កុយ គួង បានប្រាប់តាមទូរស័ព្ទថា កម្ពុជា បានទទួលកំណត់ទូតនោះនៅពេលព្រឹកថ្ងៃសុក្រ ទី១៦ ខែឧសភា។ លោកបន្តថា កម្ពុជា បានយកចិត្តទុកដាក់ចំពោះបញ្ហាសុវត្ថិភាពរបស់ពលរដ្ឋចិន នៅកម្ពុជា តាំងពីមុនពេលទទួលបានកំណត់ទូតនោះផង។
លោក កុយ គួង៖ «ជាពិសេសគេសុំស្នើអោយយើងជួយការពារស្ថានទូត ហើយនឹងជួយសម្រួលដល់ជនជាតិចិន ដែលចូលមកកម្ពុជា ពីប្រទេសវៀតណាម។ តាមពិតទៅ រដ្ឋាភិបាលយើងបានចាត់វិធានការមុនហើយ មានន័យថា យើងបានជួយសម្រួលដល់ជនជាតិចិន ដែលឆ្លងកាត់ពីវៀតណាម មកកម្ពុជា យើង។ យើងផ្អែកលើគោលការណ៍មនុស្សធម៌។ កម្ពុជា ដាច់ខាតមិនអនុញ្ញាតអោយជនបរទេសណាមួយដែលឋិតនៅលើទឹកដីកម្ពុជា ប្រឆាំងទៅនឹងជនបរទេសដទៃទៀត ដែលមានវត្តមាននៅកម្ពុជា ទេ យើងមិនអនុញ្ញាតដាច់ខាត»។
ទាក់ទិនដល់សុវត្ថិភាពស្ថានទូតចិន នៅខាងមុខ និងបរិវេណក្បែរៗស្ថានទូតនេះ ឃើញមានមន្ត្រីនគរបាលប្រមាណជាង ១០នាក់ បានដាក់វេនគ្នារក្សាសន្តិសុខ។ ការពង្រឹងសន្តិសុខនេះ កើតឡើងបន្ទាប់ពីសមាគមវៀតណាម នៅកម្ពុជា បានព្រមានថា នឹងធ្វើបាតុកម្មនៅខាងមុខស្ថានទូតចិន បន្ទាប់ពីកើតមានអំពើហិង្សាក្នុងប្រទេសវៀតណាម ក្នុងសកម្មភាពទាមទារឲ្យប្រទេសចិន ដកឧបករណ៍បូមប្រេងក្នុងដែនសមុទ្រដែលមានជម្លោះជាមួយប្រទេសវៀតណាម៕
ប្រភប:អាស៊ីសេរី
No comments:
Post a Comment