Monday, May 19, 2014
កម្ពុជានឹងប្រទេសជាប់ព្រំប្រទល់ខ្លួនកំពុងជួបបញ្ហាព្រមគ្នា
បងប្អូន៤នាក់ពាក់មួកតែមួយ៖ កម្ពុជា វៀតណាម ឡាវ និងថៃ ដែលជាសមាជិកអាស៊ានដូចគ្នា ហាក់ដូចកំពុងមានបញ្ហាសេដ្ធកិច្ច នយោបាយព្រមៗគ្នា។ បញ្ហារួមមាន៖
កម្ពុជា៖ រាំងស្ទះនយោបាយ ជាច្រើនខែ ចាប់តាំងពីក្រោយការបោះឆ្នោះជ្រើសរើសតំនាងរាស្រ្ត នៅខែកក្កដា២០១៣មកម្លេះ។ គណះបក្សកាន់អំណាចនិងគណះបក្សប្រឆាំងនៅតែមិនអាចរកដំណោះស្រាយល្អណាមួយនៅឡើង។ បញ្ហប្រាក់ខែ ដីធ្លី ព្រៃឈើ អំពើហិង្សានិងបាតុកម្មជាច្រើនបានកើតឡើងស្ទើរៀងរាល់ថ្ងៃនៅកម្ពុជា។
វៀតណាម៖ បញ្ហាជម្លោះដែលសមុទ្រជាមួយចិនកំពុងមានសភាពការណ៍តានតឹងជាខ្លាំង។ ជម្លោះនេះបណ្តាលអោយ មានការកូដកម្ម ដុតរោងចក្រចិននៅវៀតណាមចំនួន១៥កន្លែង និងមនុស្សជាច្រើនអ្នកបានស្លាប់នឹងចាប់ខ្លួន។
ឡាវ៖ បញ្ហាដឹកជញ្ជូនតាមផ្លូវអាកាសហាក់ដូចជាមានបញ្ហាច្រើន។ មិនប៉ុន្មានខែពីគ្នា ស្រាប់តែមានករណីធ្លាក់យន្តហោះពីរលើកមកហើយ ជាអាទិ៍ដូចជាការធ្លាក់យន្តហោះកាលពីថ្ងៃទី១៧ខែឧសភាកន្លងទៅនេះដែលបណ្តាលអោយលោករដ្ធម្ឲន្ត្រីការពារជាតិនឹងភរិយាបានបាត់បង់ជីវិត រួមនិងមនុស្សជាច្រើនអ្នកទៀតផងដែរ។
ថៃ៖ មានការព្រួយបារម្ភថា ការប្រឈមមុខគ្នាឬជម្លោះអស់រយៈពេលជាច្រើនខែរវាងភាគីគាំទ្រនិងភាគីប្រឆាំងរដ្ឋាភិបាល អាចធ្លាក់ចូលក្នុងអំពើហិង្សាកាន់តែខ្លាំងឡើង ប្រសិនបើ ភាគីទាំង២ មិនអាចឈោងដល់ការព្រមព្រៀងមតិនោះទេ។គណៈកម្មការរៀបចំការបោះឆ្នោត បានស្នើធ្វើការបោះឆ្នោតនៅថ្ងៃទី២០ ខែកក្កដា បន្ទាប់ពីការបោះឆ្នោតខែកុម្ភៈ បានត្រូវបដិសេធដោយបាតុករប្រឆាំងរដ្ឋាភិបាល។ ក៏ប៉ុន្តែ ការបន្តភាពច្របូកច្របល់ខាងនយោបាយ បានធ្វើឲ្យមានចម្ងល់ថាតើការបោះឆ្នោត អាចធ្វើឡើងបានដែរឬទេ។
បញ្ហាប្រឈមរបស់កម្ពុជាលើការតភ្ជាប់ផលិតកម្មទំនិញទៅកាន់អាស៊ាន
កម្ពុជាជាប្រទេសតូច ប៉ុន្តែមានទីតាំងភូមិសាស្ត្រល្អ ឬជាចំណុចកណ្ដាលសម្រាប់អាស៊ានធ្វើពាណិជ្ជកម្មអន្តរជាតិ។ សក្ដានុពលនេះ ជាឱកាសសម្រាប់ប្រទេសកម្ពុជា ដើម្បីអភិវឌ្ឍសេដ្ឋកិច្ច បង្កើនអាជីវកម្ម បង្កើតការងារ និងកាត់បន្ថយភាពក្រីក្រ។
ឯកសារជាច្រើនបានរកឃើញថា ការអភិវឌ្ឍហេដ្ឋារចនាសម្ព័ន្ធរបស់ប្រទេសកម្ពុជា ស្ថិតនៅកម្រិតទាបជាងប្រទេសសមាជិកអាស៊ានផ្សេងទៀត។ របាយការណ៍ប្រកួតប្រជែងសកល ដែលហៅជាភាសាអង់គ្លេសថា Global Competitiveness Report បានចាត់ចំណាត់ថ្នាក់ពិន្ទុកម្ពុជាលេខ ៣ ដែលជាពិន្ទុទាបជាងប្រទេសអាស៊ានដទៃទៀត។ ការទទួលបានចំណាត់នេះ ដោយសារតែការដឹកជញ្ជូនតាមផ្លូវគោកមានចំនួនតិច ហើយប្រព័ន្ធផ្លូវរថភ្លើងមានភាពលំបាក។
ស្របពេលជាមួយគ្នានេះ ប្រសិទ្ធភាពនៃការដឹកជញ្ជូនតាមផ្លូវទឹកមានភាពប្រសើរឡើង ប៉ុន្តែតម្លៃនៃការដឹកជញ្ជូនវិញ មានតម្លៃខ្ពស់នៅឡើយ។ ការផ្គត់ផ្គង់ថាមពលអគ្គិសនី ក៏នៅមានតម្លៃខ្ពស់ មិនគ្រប់គ្រាន់ និងខ្វះភាពទុកចិត្តបាន។ បណ្ដាញគ្រប់គ្រងប្រព័ន្ធប្រាស្រ័យទាក់ទង ក៏នៅមានកម្រិតទាប។
ចំណែករបាយការណ៍ភាពវាស់វែងការដឹកជញ្ជូនរបស់ធនាគារពិភពលោក បានចំណាត់ថ្នាក់ប្រទេសកម្ពុជា ស្ថិតនៅលេខ១០០ ក្នុងចំណោមប្រទេស១៥០ នៅលើពិភពលោក។ តួលេខនេះ បញ្ជាក់ថា កម្ពុជាមានសន្ទស្សន៍ដឹកជញ្ជូនទាបជាងប្រទេសដទៃទៀត នៅក្នុងប្រទេសអាស៊ាន។ ភាពអន់ខ្សោយនេះ ដោយសារតែកត្តាសំខាន់ពីរ ទីមួយ ការបង់កម្រៃមិនមានតម្លាភាព ឬតែងបង់មិនផ្លូវការ ដែលបានលាក់បំបាំងការការចំណាយពិតប្រាកដ ជាមូលហេតុធ្វើការចំណាយដឹកជញ្ជូនមានតម្លៃខ្ពស់។ កត្តាសំខាន់ទីពីរ គឺភាពខ្វះខាតនៃរួមបញ្ចូលតែមួយ លើផ្នែកដឹកជញ្ជូនរវាងប្រទេសនៅក្នុងតំបន់ ដែលប៉ះពាល់ដល់ការផ្ទុកទំនិញ ការពន្យារពេល និងជំរុញឲ្យថ្លៃដឹកជញ្ជូនខ្ពស់។
ដើម្បីបង្កើនការតភ្ជាប់អាស៊ាននេះ ប្រទេសកម្ពុជាត្រូវអភិវឌ្ឍផ្នែកហេដ្ឋារចនាសម្ព័ន្ធ និងការបង្កើនថាមពល តាមរយៈកិច្ចសហប្រតិបត្តិការរវាងម្ចាស់ជំនួយទ្វេភាគី និងពហុភាគី ផ្នែកឯកជន។ ការវិនិយោគនោះត្រូវផ្ដោតលើការកាត់បន្ថយវប្បធម៌នៃការយកកម្រៃមិនផ្លូវការ កែទម្រង់ប្រព័ន្ធគយ និងការចែករំលែកព័ត៌មាន អំពីតម្លៃនៃការដឹកជញ្ជូនឲ្យបានទូលំទូលាយ។
រដ្ឋមន្ត្រីក្រសួងពាណិជ្ជកម្ម លោក ស៊ុន ចាន់ថុល មានប្រសាសន៍ថា ប្រទេសកម្ពុជាជាសមាជិកអាស៊ាន ដែលមានការទទួលខុសត្រូវ ដើម្បីកសាងសហគមន៍សេដ្ឋកិច្ចអាស៊ាននៅឆ្នាំ២០១៥។ ដើម្បីសម្រេចបានគោលដៅនេះ ប្រទេសកម្ពុជា បានវិនិយោគលើផ្នែកហេដ្ឋារចនាសម្ព័ន្ធ ក្នុងនោះមានផ្លូវទឹក ផ្លូវដែក និងផ្លូវរថភ្លើង។ បន្ថែមលើនេះ គម្រោងវិនិយោគរបស់អាស៊ាន មួយចំនួនក៏បាន ពង្រីកការតភ្ជាប់រវាងប្រទេសកម្ពុជា ទៅបណ្ដាប្រទេសសមាជិកអាស៊ានដទៃទៀត។
លោក ស៊ុន ចាន់ថុល មានប្រសាសន៍បន្តថា ប្រទេសកម្ពុជាបានប្ដេជ្ញាលើការកសាងហេដ្ឋារចនាសម្ព័ន្ធដែលធ្វើឱ្យទំនិញ និងការចល័តនៃកម្លាំងពលកម្ម បានកាន់តែសេរីនៅក្នុងតំបន់អាស៊ាន។
បច្ចុប្បន្ន ប្រទេសកម្ពុជា បានអភិវឌ្ឍវិស័យហេដ្ឋារចនាសម្ព័ន្ធ ដោយសារជំនួយពីប្រទេសចិន។ ចំណែកដៃគូអភិវឌ្ឍនានា ដូចជាប្រទេស ជប៉ុន កូរ៉េខាងត្បូង បានផ្ដល់ជំនួយយ៉ាងច្រើនសន្ធឹកសន្ធាប់ ដែលមានតម្លៃជិត ៤០០លានដុល្លារអាមេរិក តាមរយៈធនាគារអភិវឌ្ឍន៍អាស៊ីប្រចាំកម្ពុជា។
ប្រធានធនាគារអភិវឌ្ឍន៍អាស៊ីប្រចាំកម្ពុជា លោក អៀរិក ស៊ីដវិច (Eric Sidgwick) មានប្រសាសន៍ថាទោះបីជាផ្នែកហេដ្ឋារចនាសម្ព័ន្ធរបស់កម្ពុជា បានរីកចម្រើនគួរឲ្យកត់សម្គាល់នោះ ប៉ុន្តែរដ្ឋាភិបាលកម្ពុជា ត្រូវតែបន្តកិច្ចប្រឹងប្រែងរបស់ខ្លួនបន្ថែមទៀត ដើម្បីលើកកម្ពស់ការតភ្ជាប់ទៅកាន់ទីផ្សារអាស៊ាន។
ភាពរីកចម្រើនដែលកម្ពុជាសម្រេចបាន ទាំងការកសាងផ្លូវ និងការដឹកជញ្ជូន គឺគួរឲ្យកោតសរសើរ។ ជាក់ស្ដែង ភាពជោគជ័យនោះបានជំរុញឲ្យពាណិជ្ជកម្មរបស់កម្ពុជា កើនឡើង ប៉ុន្តែកម្ពុជាត្រូវរក្សាកំណើននៃកសាងហេដ្ឋារចនាសម្ព័ន្ធតទៅមុខទៀត។
លោក អៀរិក ស៊ីដវិច បានកត់សម្គាល់ថាការចរាចរទំនិញកាន់តែលឿន កាន់តែថោក និងប្រកបដោយប្រសិទ្ធភាពខ្ពស់ គឺពឹងលើភាពរីកចម្រើនផ្នែកហេដ្ឋារចនាសម្ព័ន្ធ និងពលកម្មជំនាញ។
ថ្នាក់ដឹកនាំអាស៊ានក៏បានទទួលស្គាល់ថា បញ្ហានានាដែលពាក់ព័ន្ធនឹងកិច្ចការតភ្ជាប់អាស៊ាននោះ គឺជាឧបសគ្គចម្បងដល់ការបង្កើតសហគមន៍អាស៊ាន។ សេចក្ដីប្រកាសព័ត៌មានរបស់អាស៊ាននៅដើមខែឧសភា ២០១៤ បានបង្ហាញថា ការងារដឹកជញ្ជូន ជាបញ្ហាដែលដោះស្រាយគ្មានព្រំដែន។
សេចក្ដីប្រកាសព័ត៌មានដដែលបានបញ្ជាក់ថា ដើម្បីលើកការតភ្ជាប់អាស៊ាននេះ រដ្ឋាភិបាលនិងផ្នែកឧស្សាហកម្ម ត្រូវយកបញ្ហានេះបញ្ចូលនៅកម្មវិធី និងគោលនយោបាយអភិវឌ្ឍរបស់ប្រទេសសមាជិកអាស៊ាននីមួយៗ។ កិច្ចការសំខាន់មួយចំនួន ក្នុងការតភ្ជាប់អាស៊ាន រួមមានការកសាងសមត្ថភាព ជាពិសេសការអភិវឌ្ឍធនធានមនុស្សរបស់រដ្ឋាភិបាល និងក្នុងផ្នែកដឹកជញ្ជូន ការលើកកម្ពស់ការយល់ដឹងរបស់សហគមន៍ និងអ្នកនយោបាយ រួមទាំងការបង្កើតច្បាប់ថ្មីបន្ថែមទៀត ដើម្បីគ្រប់គ្រងកិច្ចការដឹកជញ្ជូនជាដើម។
របាយការណ៍របស់សមាគមប្រជាជាតិអាស៊ីអាគ្នេយ៍ បានប៉ាន់ស្មានថា ការចំណាយលើការកសាងផ្នែកហេដ្ឋារចនាសម្ព័ន្ធរវាងប្រទេសអាស៊ានទាំង១០ យ៉ាងហោចណាស់ត្រូវការទឹកប្រាក់ ៣ពាន់លានដុល្លារអាមេរិកបន្ថែមទៀត។
ស្របពេលដែលអាស៊ាន មានឧបសគ្គជាច្រើន ការវិភាគរបស់ស្ថាប័នអន្តរជាតិ បានអះអាងថា ប័ណ្ណពិន្ទុរបស់អាស៊ាន បង្ហាញឲ្យឃើញថា ប្រទេសសមាជិកអាស៊ានទាំង១០ មិនអាចសម្រេចបាននូវគោលដៅសហគមន៍សេដ្ឋកិច្ចអាស៊ាន នៅត្រឹមកាលបរិច្ឆេទ ដែលកំណត់ដោយខ្លួនឯងនៅឆ្នាំ២០១៥ នោះទេ បើទោះជាបីជាកន្លងមក រាល់សកម្មភាពរបស់អាស៊ានសម្រេចបាននូវកិច្ចការវិជ្ជមានមួយចំនួនយ៉ាងណាក៏ដោយ៕
កំណើនសេដ្ឋកិច្ចរបស់ប្រទេសសមាជិកអាស៊ានទាំង១០ពីឥទ្ធិពលរបស់ចិន
ស្ថានភាពអភិវឌ្ឍន៍សេដ្ឋកិច្ចរបស់ប្រទេសសមាជិកអាស៊ាន ត្រូវបានគេព្យាករថា ជាតំបន់ដែលមានកំណើនសេដ្ឋកិច្ចខ្លាំង ដោយសារតែមានភាពប្រសើរឡើងវិញនៃសេដ្ឋកិច្ចពិភពលោក ជាពិសេសពីប្រទេសចិន។
ស្ថានភាពអភិវឌ្ឍន៍ ឬមូលដ្ឋានជំរុញកំណើនសេដ្ឋកិច្ចរបស់ប្រទេសអាស៊ាន តែងពឹងលើទីផ្សារក្រៅ ច្រើនជាងពឹងលើទីផ្សារក្នុងអាស៊ាន ដោយសារតែអាស៊ាន ភាគច្រើនជាប្រទេសអ្នកផលិតដើម្បីនាំចេញ។ បច្ចុប្បន្ន កំណើនសេដ្ឋកិច្ចរវាងប្រទេសសមាជិកអាស៊ាននីមួយៗ មានភាពខុសគ្នាតាមរយៈគោលនយោបាយជំរុញកំណើនសេដ្ឋកិច្ចខុសគ្នានៅក្នុងទីផ្សារអន្តរជាតិ។
ស្ថាប័នស្រាវជ្រាវអន្តរជាតិ រួមមានធនាគារពិភពលោក បានព្យាករកំណើនសេដ្ឋកិច្ចអាស៊ានមានភាពប្រសើរឡើងនៅក្នុងឆ្នាំ២០១៤ ដោយសារតែកំណើនសេដ្ឋកិច្ចចិន។ ស្ថាប័ននេះ បានចាត់ទុកថា តំបន់អាស៊ានជាតំបន់ដែលមានកំណើនសេដ្ឋកិច្ចខ្លាំងជាងគេនៅលើពិភពលោក។
អនុប្រធានធនាគារពិភពលោកប្រចាំតំបន់អាស៊ីបូព៌ានិងប៉ាស៊ីហ្វិក លោក អាក់សែល វ៉ាន់ត្រុតសេនប៊ើគ (Axel Trotsenburg) មានប្រសាសន៍នៅក្នុងសន្និសីទសារព័ត៌មានពីទីស្នាក់ការធនាគារពិភពលោកនៅប្រទេសសិង្ហបុរី កាលពីដើមខែមេសា ឆ្នាំ២០១៤ ថា បណ្ដាប្រទេសនៅតំបន់អាស៊ីបានដើរតួនាទីយ៉ាងសំខាន់ ដល់កំណើនសេដ្ឋកិច្ចពិភពលោក ចាប់តាំងពីមានវិបត្តិសេដ្ឋកិច្ចសកលកន្លងមក។ ស្របពេលដែលសេដ្ឋកិច្ចអាស៊ានមានកំណើន ប៉ុន្តែឧបសគ្គចំពោះកំណើនបានបង្ហាញជាបញ្ហាប្រឈមផ្សេងៗគ្នារវាងប្រទេសសមាជិកអាស៊ានទាំង១០។
សេដ្ឋកិច្ចដែលធំជាងនៅក្នុងតំបន់អាស៊ាន គឺប្រទេសថៃ និងឥណ្ឌូនេស៊ី ដែលប្រទេសទាំងពីរនេះ អាចប្រឈមនឹងវិបត្តិបំណុលគ្រួសារដែលរំពឹងថា នឹងកើនឡើងខ្ពស់។ ចំពោះកំណើនសេដ្ឋកិច្ចរបស់ប្រទេសម៉ាឡេស៊ី នឹងកើនឡើងរហូតដល់ ៥% នៅក្នុងឆ្នាំ២០១៤ ដោយសារការនាំចេញបានកើនឡើង។ នៅក្នុងប្រទេសហ្វីលីពីន កំណើនសេដ្ឋកិច្ចអាចនឹងកើនជាង ៦% ប៉ុន្តែប្រទេសនេះ ប្រឈមនឹងការចំណាយលើការស្ដារឡើងវិញពីផលប៉ះពាល់គ្រោះមហន្តរាយធម្មជាតិ ដែលបានកើនឡើងនៅឆ្នាំ២០១៣។ ទោះជាយ៉ាងណាក៏ដោយ បណ្ដាប្រទេសដែលមានទំហំសេដ្ឋកិច្ចតូច ត្រូវបានគេព្យាករថា នឹងមានកំណើនសេដ្ឋកិច្ចថេរ។
ក្នុងប្រទេសកម្ពុជា នៅស្ថានការណ៍ក្រោយការបោះឆ្នោត កំណើនសេដ្ឋកិច្ចត្រូវបានគេព្យាករថា នឹងមានកំណើនជាង ៧% ប៉ុន្តែប្រទេសនេះប្រឈមនឹងហានិភ័យនៃទីផ្សារពលកម្ម។ ស្របពេលជាមួយគ្នានេះ កំណើនសេដ្ឋកិច្ចរបស់ប្រទេសភូមា ឬមីយ៉ាន់ម៉ា រំពឹងថា នឹងមានកំណើនខ្ពស់ជាងកម្ពុជា ដែលកើតជិត ៨% នៅក្នុង២០១៤ បន្ទាប់ពីប្រទេសនេះប្រកាសធ្វើកំណែទម្រង់ផ្នែកស្ថាប័នរបស់ខ្លួន។
ចំណែកប្រទេសវៀតណាម ដែលប្រឈមនឹងកំណែទម្រង់ប្រព័ន្ធធនាគារ ការព្យាករណ៍កំណើនសេដ្ឋកិច្ចរបស់ប្រទេសនេះ មានអត្រាជាង ៥% នៅក្នុងឆ្នាំ២០១៤។ ប៉ុន្តែអ្នកសេដ្ឋកិច្ចបានបង្ហាញអំពីហានិភ័យចំពោះការព្យាករក្នុងតំបន់អាស៊ាននេះនៅតែមាន។
ប្រធានសេដ្ឋកិច្ចវិទូរបស់ធនាគារពិភពលោកប្រចាំតំបន់អាស៊ីបូព៌ានិងប៉ាស៊ីហ្វិក លោក ប៊ើត ហូហ្វមេន (Bert Hofman) មានប្រសាសន៍ថា ប្រទេសនៅតំបន់អាស៊ានអាចរក្សាកំណើនសេដ្ឋកិច្ចរបស់ខ្លួននៅក្នុងរយៈពេលវែងបាននោះ គឺបង្កើតទំនុកចិត្តទីផ្សារនាំចេញ និងការកែប្រែរចនាសម្ព័ន្ធមូលដ្ឋានសេដ្ឋកិច្ច។
គំនិតផ្ដួចផ្ដើមមួយចំនួននៅកម្មវិធីកំណែទម្រង់នោះរួមមាន កំណែទម្រង់ពន្ធដារ និងការកាត់បន្ថយឧបសគ្គចំពោះការវិនិយោគរបស់វិស័យឯកជន ដែលជាកម្មវិធីសំខាន់បំផុត ដើម្បីជំរុញកំណើនសេដ្ឋកិច្ចអាស៊ាន។
របាយការណ៍របស់ធនាគារពិភពលោកប្រចាំឆ្នាំ២០១៤ បានកត់សម្គាល់ឃើញថា ភាពមិនប្រាកដប្រជាសេដ្ឋកិច្ចរបស់ប្រទេសចិន អាចប៉ះពាល់ដល់កំណើនសេដ្ឋកិច្ចនៅក្នុងតំបន់អាស៊ាន ជាពិសេសប្រទេសដែលពឹងផ្នែកលើការនាំចេញធនធានធម្មជាតិ។ ក្នុងន័យនេះ ទំនាក់ទំនងរវាងចិននិងអាស៊ាន បង្ហាញយ៉ាងច្បាស់ថា បានរងឥទ្ធិពលគ្នាទៅវិញទៅមកលើផ្នែកពាណិជ្ជកម្ម សេដ្ឋកិច្ច នយោបាយ និងផ្នែកសន្តិសុខ។ ទន្ទឹមនឹងនេះ ប្រទេសចិន បានផ្ដល់ការអនុគ្រោះពន្ធលើការនាំចូលទំនិញពីប្រទេសកម្ពុជា ឡាវ និងប្រទេសភូមា ឬមីយ៉ាន់ម៉ា។
ប្រទេសមហាអំណាចចិន បានប្រឹងប្រែងបង្កើនឥទ្ធិពលរបស់ខ្លួនទៅលើប្រទេសសមាគមប្រជាជាតិអាស៊ីអាគ្នេយ៍ ដែលគ្រោងនឹងបង្កើតតំបន់តែមួយនៅឆ្នាំ២០១៥ ដែលគេចាត់ថា ជាតំបន់មួយសម្បូរទៅដោយធនធានធម្មជាតិ និងជាទីកន្លែងសម្រាប់ពង្រីកមហិច្ឆតារបស់ខ្លួន។ ចំពោះប្រទេសសមាជិកអាស៊ានវិញ ក៏បានប្រឹងប្រែងទទួលយកអត្ថប្រយោជន៍ពីប្រទេសមហាអំណាចដែលផ្ដល់ឲ្យ ទោះជាតាមវិធីណាក៏ដោយដើម្បីជំរុញកំណើនសេដ្ឋកិច្ច។
អ្នកវិភាគសេដ្ឋកិច្ច និងអ្នកវិភាគនយោបាយ បានលើកឡើងថា អាស៊ានបានទទួលយកគម្រោងវិនិយោគ និងកិច្ចព្រមព្រៀងពាណិជ្ជកម្មជាច្រើនពីប្រទេសចិន ដោយគ្មានគិតអំពីទស្សនៈវិស័យនៅពេលអនាគតឡើយ។ មានន័យថា ការទទួលបានទំហំពាណិជ្ជកម្ម និងវិនិយោគកាន់តែធំ នឹងធ្វើឲ្យការអភិវឌ្ឍសេដ្ឋកិច្ចរបស់ខ្លួនរីកចម្រើនបានយ៉ាងឆាប់រហ័ស។
របាយការណ៍របស់សមាគមប្រជាជាតិអាស៊ីអាគ្នេយ៍ស្ដីពីពាណិជ្ជកម្មបានបង្ហាញថា ទំហំពាណិជ្ជកម្មផ្ទៃក្នុងរវាងប្រទេសសមាជិកអាស៊ាន មានប្រមាណ ២៥% ។ ការធ្វើពាណិជ្ជកម្មរវាងអាស៊ាននិងប្រទេសចិន មានប្រមាណ ១១% នៃទំហំពាណិជ្ជកម្មសរុបរបស់អាស៊ាន។
បន្ថែមលើនេះប្រទេសចិន មានទំនាក់ទំនងល្អលើផ្នែកពាណិជ្ជកម្មជាមួយអាស៊ាន ដែលប្រទេសចិន អាចផលិតទំនិញលក់ឲ្យប្រជាពលរដ្ឋអាស៊ានត្រង់តម្លៃមួយថោកស្របទៅតាមចំណូលពួកគេអាចរកបាន ប្រមាណ ៣ពាន់ដុល្លារក្នុងមួយឆ្នាំ។ ភាពខ្លាំងរបស់ចិន មួយទៀត គឺការផ្ដល់ជំនួយនិងកម្ចីដោយមិនគិតអំពីគោលបំណង។
ទោះជាយ៉ាងណាក៏ដោយ ទំនាក់ទំនងពាណិជ្ជកម្មរវាងប្រទេសចិន ជាមួយអាស៊ាន បានចាប់ផ្ដើមតាំងពីឆ្នាំ១៩៩១ ហើយចិនបានក្លាយជាដៃគូចរចារវាងអាស៊ាននៅឆ្នាំ១៩៩៦។
ប្រទេសសមាជិកអាស៊ានចាស់ រួមមានប្រទេសថៃ សិង្ហបុរី ប្រ៊ុយណេ និងឥណ្ឌូនេស៊ី បាបបង្កើតតំបន់ពាណិជ្ជកម្មសេរីអាស៊ានចិន នៅឆ្នាំ២០១០ ប៉ុន្តែប្រទេសហ្វីលីពីន និងម៉ាឡេស៊ី បង្កើតនៅឆ្នាំ២០១២ ហើយប្រទេសសមាជិកអាស៊ានថ្មី រួមមានប្រទេសកម្ពុជា ឡាវ វៀតណាម ភូមា ឬមីយ៉ាន់ម៉ា បានឯកភាពចំពោះការបង្កើតតំបន់ពាណិជ្ជកម្មសេរីអាស៊ានចិន នៅឆ្នាំ២០១៥។ ទំនាក់ទំនងនេះ បានបង្ហាញយ៉ាងច្បាស់ថា ការកើនឡើងសេដ្ឋកិច្ចអាស៊ានត្រូវឆ្លើយតបនឹងកំណើនសេដ្ឋកិច្ចរបស់ចិន៕
តួនាទីអាស៊ានក្នុងការដោះស្រាយជម្លោះសមុទ្រចិនខាងត្បូង
ជម្លោះលើដែនទឹកសមុទ្រចិនខាងត្បូង បានក្លាយជាប្រធានបទក្ដៅសម្រាប់ប្រធានអាស៊ានប្ដូរវេន ត្រូវរកដំណោះស្រាយបញ្ហានេះឲ្យបានឆាប់រហ័ស។ បច្ចុប្បន្នជម្លោះសមុទ្រចិនខាងត្បូង បានបង្កឲ្យអំពើហិង្សារហូតដល់មានមនុស្សស្លាប់និងរងរបួសជាច្រើននាក់នៅប្រទេសវៀតណាម។
អ្នកជំនាញផ្នែកកិច្ចការអាស៊ានអះអាងថា តួនាទីរបស់អាស៊ាន មិនអាចដោះស្រាយបញ្ហានេះបានទេ លុះត្រាតែមាន ការជួយជ្រោមជ្រែងពីប្រទេសមហាអំណាចនិងអង្គការសហប្រជាជាតិ។
អ្នកតាមដានស្ថានការណ៍នយោបាយបានលើកឡើងថា ប្រទេសដែលចាប់យកគោលការណ៍គ្រប់គ្រងប្រទេសបែបកុម្មុយនិស្តកម្រនឹងអនុញ្ញាតឲ្យប្រជាជនរបស់ខ្លួនចេញមុខតវ៉ាប្រឆាំងនឹងស្ថានការណ៍ណាមួយណាស់។ ជាក់ស្ដែងការធ្វើបាតុកម្មប្រឆាំងនឹងជម្លោះដែនសមុទ្រចិនខាងត្បូងដែលបង្កឲ្យអំពើហិង្សា ហាក់ជាការរៀបចំដោយរដ្ឋាភិបាលវៀតណាម ដែលគ្មានសមត្ថភាព។ ភាពអសមត្ថភាពនេះ អាចបង្កឲ្យក្រុមដែលមាននិន្នាការប្រជាធិបតេយ្យនៅវៀតណាម ផ្ទុះឡើងទៅវិញ។ ទោះជាយ៉ាងណាក៏ដោយ ការធ្វើបាតុកម្មដែលកើតឡើងនៅវៀតណាម ប្រឆាំងនឹងរឿងសមុទ្រចិនខាងត្បូងនេះ ជាការបង្ហាញទៅភាគីចិនថា ប្រជាពលរដ្ឋនិងរដ្ឋាភិបាលវៀតណាម មិនសប្បាយនឹងប្រទេសចិនឡើយ ចំពោះការខួងយកប្រេងនៅតំបន់ដែនទឹកដែលមានជម្លោះនោះ។
តើកម្ពុជា គួរគាំទ្រចិន ឬវៀតណាម ចំពោះរឿងសមុទ្រចិនខាងត្បូង។ អ្នកវិភាគនយោបាយអះអាងថា ករណីនេះ កម្ពុជាត្រូវស្ថិតនៅអព្យាក្រឹត ទោះបីជាប្រទេសវៀតណាមនិងចិន មានគុណបំណាច់ធំដល់អ្នកនយោបាយកម្ពុជា គ្រប់សម័យកាលយ៉ាងណាក៏ដោយ។ ស្របពេលដែលប្រទេសទាំងវៀតណាម និងថៃ មានបញ្ហា ប្រទេសកម្ពុជា គួរតែប្រើឱកាសដើម្បីទាក់ទាញអ្នកវិនិយោគ។ ហេតុផលនេះ កម្ពុជាមិនអាចគាំទ្រភាគីមួយ ហើយប្រឆាំងភាគីណាមួយនោះទេ។ មានន័យថា បើកម្ពុជាគាំទ្រវៀតណាម ដែលជាសមាជិកអាស៊ានដូចគ្នា នោះកម្ពុជានឹងបាត់បង់ចំណែកទីផ្សារ លក់ផលិតផលរបស់ខ្លួននៅប្រទេសចិន។
អ្នកវិភាគនយោបាយលោកបណ្ឌិត សុខ ទូច មានប្រសាសន៍ថា ការគាំទ្រវៀតណាម កម្ពុជានឹងមិនទទួលបានផលប្រយោជន៍ទាំងអស់ ដោយសារតែវៀតណាម គិតអំពីអត្ថប្រយោជន៍ផ្ទាល់ខ្លួនរបស់គេតែប៉ុណ្ណោះ។ បញ្ហានេះ វៀតណាមធ្លាប់យកទីតាំងប្រទេសកម្ពុជា ជាទីលានសាកកម្លាំងគ្នារវាងលទ្ធិកុម្មុយនិស្តនិងសេរីនិយមជាច្រើនទសវត្សរ៍កន្លងមក។
លោកបណ្ឌិត សុខ ទូច បន្ថែមថា កម្ពុជាត្រូវតែចាប់យកឱកាសដូចដែលប្រទេសវៀតណាម និងថៃ ធ្លាប់ប្រើយកផលចំណេញពីកម្ពុជា នៅពេលដែលកម្ពុជា មានវិបត្តិនយោបាយនៅឆ្នាំ១៩៩៨។
អ្នកវិភាគមួយចំនួនបានលើកឡើងថា សមាគមប្រជាជាតិអាស៊ីអាគ្នេយ៍ដែលហៅកាត់ថា អាស៊ាន មិនអាចដោះស្រាយបញ្ហាសមុទ្រចិនខាងត្បូងឲ្យដល់ប្រទេសសមាជិកបានឡើយ ដោយសារតែអាស៊ានមានប្រព័ន្ធគ្រប់គ្រងរដ្ឋខុសគ្នា និងមាននិន្នាការគាំទ្រមហាអំណាចខុសគ្នា។ ទោះបីជាកិច្ចប្រជុំអាស៊ានរៀងរាល់ឆ្នាំបានលើកយកបញ្ហានេះមកជជែកគ្នារវាងប្រទេសភាគីជម្លោះ ប៉ុន្តែត្រឹមតែចេញសេចក្ដីប្រកាសសម្របសម្រួលប៉ុណ្ណោះ។
សេចក្ដីប្រកាសព័ត៌មានរបស់កិច្ចប្រជុំអាស៊ានកាលពីថ្ងៃទី១០ ឧសភា ២០១៤ នៅប្រទេសមីយ៉ាន់ម៉ា បង្ហាញថា គ្រប់ភាគីទាំងអស់ត្រូវរក្សាស្ថិរភាព និងត្រូវគោរពតាមអនុសញ្ញារបស់អង្គការសហប្រជាជាតិស្ដីពីច្បាប់សមុទ្រនៅឆ្នាំ១៩៨២។ ប៉ុន្តែភាគីចិន បានគូសដែនសមុទ្រចិន ដែលផ្ទុយពីអនុសញ្ញាអន្តរជាតិរបស់អង្គការសហប្រជាជាតិ។ តំបន់ដែលមានជម្លោះភាគីច្រើនបំផុតនៅក្នុងកោះស្ប្រាតលី (Spratlys) និងកោះប៉ារ៉ាសែល (Paracels)។
អ្នកវិភាគកិច្ចការអាស៊ានបានអះអាងថា អាស៊ានមិនអាចដោះស្រាយជម្លោះសមុទ្រចិនខាងត្បូងបានទេ ព្រោះបញ្ហាដែលកើតឡើងនៅប្រទេសសមាជិកអាស៊ានកន្លងមក ដូចជាជម្លោះព្រំដែនកម្ពុជា-ថៃ។ នៅពេលនោះ កម្ពុជាបានប្ដឹងទៅអាស៊ាន ប៉ុន្តែអាស៊ានបានជំរុញឲ្យប្ដឹងអង្គការសហប្រជាជាតិ និងរហូតដល់តុលាការយុត្តិធម៌អន្តរជាតិដែលហៅថា (ICJ)។
បញ្ហាជម្លោះសមុទ្រចិនខាងត្បូងនេះ ប្រទេសសមាជិកអាស៊ានដែលមានជម្លោះដូចជាហ្វីលីពីន វៀតណាម ម៉ាឡេស៊ី ប្រ៊ុយណេ ជំរុញឲ្យមានជជែកគ្នាជាសាធារណៈ ប៉ុន្តែភាគីចិន ទាមទារការចរចាប្រទេសនិងប្រទេស និងការពិភាក្សាធ្វើឡើងដោយសម្ងាត់ ឬបិទទ្វារ នៅពេលមានកិច្ចប្រជុំម្ដង។
ក្រៅពីនេះ ការរកដំណោះស្រាយមិនបានដោយសារតែប្រទេសមហាអំណាចធំនៅពីក្រោយជម្លោះនេះ តាមរយៈឥទ្ធិពលអំណាចនៃការចាត់ចែងគោលនយោបាយការបរទេស។ មានន័យថា ប្រទេសមហាអំណាចដូចជាសហរដ្ឋអាមេរិក ចង់រក្សាមហាអំណាចសេដ្ឋកិច្ចទីមួយលើពិភពលោក ចំណែកប្រទេសចិន ចង់ក្លាយជាមហាអំណាចសេដ្ឋកិច្ចពិភពលោកទីមួយដែរ នៅឆ្នាំ២០១៥។ ម៉្យាងវិញទៀត ប្រទេសសមាជិកអាស៊ានខ្លួនឯងក៏មិនអាចធ្វើឲ្យចិនខឹងសម្បាដោយសារទំនាក់ទំនងពាណិជ្ជកម្ម។
សាស្ត្រាចារ្យនៅសាកលវិទ្យាល័យភូមិន្ទភ្នំពេញ ផ្នែកទំនាក់ទំនងអន្តរជាតិ លោក ឡេង ធារិទ្ធ បានអះអាងថា ទាំងផលប្រយោជន៍សេដ្ឋកិច្ចនិងនយោបាយដែលប្រទេសមហាអំណាចសម្លឹងឃើញ។ ម៉្យាងវិញទៀត តំបន់សមុទ្រចិនខាងត្បូង ជាទីតាំងយុទ្ធសាស្ត្រមួយយ៉ាងសំខាន់សម្រាប់ការដឹកជញ្ជូនគាំទ្រដល់ពាណិជ្ជកម្មអន្តរជាតិ។
ហេតុផលសំខាន់មួយចំនួនដែលប្រទេសសមាជិកអាស៊ានចង់បានតំបន់សមុទ្រចិនខាងត្បូងនោះជារបស់ខ្លួន ដោយគេរកឃើញថា នៅដែនសមុទ្រនោះ សម្បូរដោយធនធានធម្មជាតិ ធនធានជលផល ជាពិសេសប្រេងនិងឧស្ម័ន ដែលមានតម្លៃរាប់ពាន់លានដុល្លារអាមេរិក។ តាមការប៉ាន់ស្មាន ធនធានប្រេងនៅតំបន់សមុទ្រចិនខាងត្បូង អាចផលិតបានជាង ១លានបារ៉ែលក្នុងមួយថ្ងៃ។ បន្ថែមលើនេះ ហេតុផលសំខាន់បីផ្សេងទៀតដែលប្រទេសមហាអំណាចដូចជាចិន និងសហរដ្ឋអាមេរិក ចូលរួមក្នុងជម្លោះសមុទ្រចិនខាងត្បូង គឺទីមួយ ជាទីតាំងនាវាចរណ៍ពាណិជ្ជកម្ម ទីពីរ ជាតំបន់រក្សាស្ថិរភាពនយោបាយ និងទីបី ជាទីកន្លែងសមស្របមួយសម្រាប់ពង្រីកឥទ្ធិពលមហាអំណាច និងការពង្រីកទីផ្សាររបស់ខ្លួន។
ជម្លោះសមុទ្រចិនខាងត្បូង ចាប់ផ្ដើមតាំងពីឆ្នាំ១៩៧៤ រហូតដល់បច្ចុប្បន្ន។ រយៈពេល ៤០ឆ្នាំនេះ ទាំងភាគីសមាជិកអាស៊ាននីមួយៗ មានការប៉ះទង្គិចគ្នាទៅវិញទៅមក ក្រៅពីមានជម្លោះជាមួយប្រទេសចិន៕
មេធាវីអន្តរជាតិនៃជនរងគ្រោះដីធ្លីនឹងប្ដឹងលោក ហ៊ុន សែន ទៅតុលាការអន្តរជាតិ
មេធាវីអន្តរជាតិតំណាងឲ្យជនរងគ្រោះនៃការបណ្ដេញពីផ្ទះសម្បែង និងដីធ្លីជាលក្ខណៈប្រព័ន្ធដោយបង្ខំ និងជនរងគ្រោះនៃការប្រើប្រាស់ហិង្សា និងការរំលោភបំពានរបស់សមត្ថកិច្ចរដ្ឋាភិបាល លោក ហ៊ុន សែន គ្រោងនឹងដាក់ពាក្យបណ្ដឹងប្រឆាំងនឹងរដ្ឋាភិបាល លោក ហ៊ុន សែន នៅតុលាការព្រហ្មទណ្ឌអន្តរជាតិ ពីបទឧក្រិដ្ឋកម្មប្រឆាំងនឹងមនុស្សជាតិ។
មេធាវីជនជាតិអង់គ្លេស លោក រីឆាដ រ៉ចជើរ (Richard Rogers) នៃក្រុមហ៊ុនមេធាវី Global Diligence ឲ្យដឹងតាមទូរស័ព្ទពីប្រទេសបារាំង ថា ក្រុមអ្នកច្បាប់ក្រុមហ៊ុនលោកបានចងក្រងឯកសារពាក្យបណ្ដឹងលម្អិតមួយប្រឆាំងរដ្ឋាភិបាលកម្ពុជា ពីបទឧក្រិដ្ឋកម្មប្រឆាំងនឹងមនុស្សជាតិ។ ពាក្យបណ្ដឹងនេះ នឹងដាក់នៅការិយាល័យព្រះរាជអាជ្ញាតុលាការព្រហ្មទណ្ឌអន្តរជាតិ នៅចុងខែឧសភា ឬដើមខែមិថុនា ឆ្នាំ២០១៤។
លោកបន្តថា ភស្តុតាងមួយចំនួនដែលលោកទទួលបានពីក្រុមអង្គការឃ្លាំមើលបញ្ហាដីធ្លីនៅកម្ពុជា បញ្ជាក់ថា យ៉ាងហោចណាស់ក៏មានពលរដ្ឋចំនួន ៧សែននាក់ រងផលប៉ះពាល់ដោយសារជម្លោះដីធ្លី ក្នុងនោះពលរដ្ឋពី ៣សែន ទៅ ៤សែននាក់ ត្រូវបានបង្ខំបណ្ដេញចេញ។ ដោយឡែកនៅរាជធានីភ្នំពេញវិញ មានពលរដ្ឋប្រមាណ ១សែននាក់ រងផលប៉ះពាល់នៃការបង្ខំបណ្ដេញចេញ។ លោកបន្តថា ក្រុមអ្នកច្បាប់ក៏បានរកឃើញថា ឧក្រិដ្ឋកម្ម ការចាប់ឃុំឃាំងដោយខុសច្បាប់ និងការធ្វើទុក្ខបុកម្នេញលើជនជាតិដើមភាគតិច និងអ្នកនយោបាយ មានលក្ខណៈធ្ងន់ធ្ងរកើតឡើងជាបន្តបន្ទាប់ និងដដែលៗ ជាបទឧក្រិដ្ឋកម្មប្រឆាំងនឹងមនុស្សជាតិ។
លោក រីឆាដ រ៉ចជើរ មានជំនឿថា តុលាការនឹងទទួលយក និងចាត់ការលើបណ្ដឹងរបស់លោក៖ «តាមរយៈព័ត៌មានដែលយើងទទួលបាន យើងជឿជាក់យ៉ាងមុតមាំថា ភស្តុតាងនៃការរំលោភសិទ្ធិមនុស្សទាំងឡាយ កើតឡើងកន្លងមក ស្មើនឹងបទល្មើសប្រឆាំងមនុស្សជាតិ។ បទឧក្រិដ្ឋកម្មទាំងនោះ យើងចាប់ផ្ដើមប្រមូលផ្តុំចាប់តាំងពីឆ្នាំ២០០២ នៅពេលកម្ពុជា បានចុះសន្ធិសញ្ញាទីក្រុងរ៉ូម។ យើងពិនិត្យលើបទល្មើសរយៈពេល ១២ឆ្នាំ ឃើញថា បទល្មើសទាំងនោះមានលក្ខណៈជាប្រព័ន្ធ មិនមែនជាករណីដាច់ដោយឡែកឡើយ»។
កាលពីខែមីនា ឆ្នាំ២០១៤ លោក មូរតុន ក្លា (Morton Sklar) មេធាវីអាមេរិកាំង ក៏បានដាក់ពាក្យបណ្ដឹងប្រឆាំង លោក ហ៊ុន សែន ពីបទឧក្រិដ្ឋកម្មប្រឆាំងនឹងមនុស្សជាតិ។ ពាក្យបណ្ដឹងរបស់ លោក រីឆាដ រ៉ចជើរ នេះជាបណ្ដឹងទី៤ប្រឆាំងនឹង លោក ហ៊ុន សែន ពីបទឧក្រិដ្ឋកម្មប្រឆាំងនឹងមនុស្សជាតិនៅតុលាការព្រហ្មទណ្ឌអន្តរជាតិ។ ការិយាល័យព្រះរាជអាជ្ញាតុលាការព្រហ្មទណ្ឌអន្តរជាតិ កំពុងពិនិត្យមើលបណ្ដឹងចំនួន៣ ដើម្បីកំណត់ថា តើបណ្ដឹងទាំងនោះស្របនឹងលក្ខន្តិកៈទីក្រុងរ៉ូម (Rome) ដែលអាចអនុញ្ញាតឲ្យតុលាការបើកសវនាការជំនុំជម្រះក្តីបាន៕
ជម្លោះដីខេត្តសៀមរាបកំពុងធ្វើឲ្យពលរដ្ឋប្រឈមនឹងគ្មានដីធ្វើស្រែ
សមាគមការពារសិទ្ធិមនុស្សអាដហុក ខេត្តសៀមរាប កំពុងព្រួយបារម្ភទៅលើបញ្ហាទំនាស់ដីធ្លី រវាងប្រជាពលរដ្ឋ នៅភូមិអូរផ្អាវ នៃឃុំស្រែណូយ ជាមួយកងទាហាននៃយោធភូមិភាគទី៤ ដែល កំពុងតែដណ្ដើមគ្នាកាប់ដីច្រើនរយហិកតារ។ ការព្រួយបារម្ភបានកើតឡើងបន្ទាប់ពីក្រុមអ្នកភូមិ និងទាហាន បានប្រឈមមុខដាក់គ្នាម្ដងមកហើយ ក្នុងពេលដែលទាហានព្យាយាមដកហូតយកឧបករណ៍ធ្វើកសិកម្ម ពីប្រជាពលរដ្ឋ។
តំណាងប្រជាពលរដ្ឋ នៅភូមិអូរផ្អាវ ឃុំស្រែណូយ ស្រុកវ៉ារិន អះអាងថា៖ យ៉ាងហោចណាស់ក៏មានអ្នកភូមិ១៧គ្រួសារ ក្នុងចំណោមជាង១០០ គ្រួសារកំពុងប្រឈមមុខនឹងការគ្មានដីធ្វើកសិកម្មទេ នៅក្នុងរដូវវស្សាឆ្នាំនេះ ដោយសារតែកងទាហាន បានចូលទៅហាមឃាត់យ៉ាងតឹងតែង។ តំណាងប្រជាពលរដ្ឋ ភូមិអូរផ្អាវ លោក ជួប ជួន មានប្រសាសន៍កាលពីរសៀលថ្ងៃអាទិត្យ ទី១៨ ខែឧសភា ថា៖ រូបគាត់ និងអ្នកភូមិ ជាង១០០ គ្រួសារទៀត កំពុងមានទំនាស់ដីប្រមាណ៤០០ហិកតារ ជាមួយកងទាហាន នៃយោធភូមិភាគទី៤ ដែលមានមូលដ្ឋាន នៅជិតនោះ។ លោក ជួប ជួន បញ្ជាក់ទៀតថា៖ ក្នុងចំណោមអ្នកភូមិដែលមានទំនាស់ដី ជាង១០០គ្រួសារនោះ គឺទាហានអាចអនុញ្ញាតឱ្យធ្វើកសិកម្មលើដីខ្លះ ក៏ប៉ុន្តែចំពោះប្រជាពលរដ្ឋ ១៧គ្រួសារវិញ គឺទាហានបានហាមឃាត់តឹងតែង៖ «ទាហានយោធភូមិភាគ៤ គេថាដីគេ គេទុកជូនកងទ័ព។ គេថាហ៊ានតែធ្វើគឺរឿងគ្នាមិនខាន។ អត់មានដីធ្វើសោះនេះ ហើយកំពុងតែរង់ចាំថ្នាក់លើគេដោះស្រាយ មិនដឹងយ៉ាងណា?»។
តំណាងប្រជាពលរដ្ឋអះអាងថា៖ កាលពីថ្ងៃទី៣ ខែឧសភាកន្លងទៅទាហានមួយក្រុមបានទៅដុតបំផ្លាញផ្ទះប្រជាពលរដ្ឋមួយខ្នង ដកហូតយកម៉ាស៊ីនកាត់ស្មៅចំនួន៣គ្រឿង ព្រមទាំងប្រមូលយក កាំបិតផ្គាក់ ពីប្រជាពលរដ្ឋចំនួន៣០ នៅពេលដែលអ្នកភូមិព្យាយាមធ្វើកសិកម្មនៅលើដីហាមឃាត់ ទាំងនោះ។
ទោះយ៉ាងណាវិទ្យុអាស៊ីសេរី មិនអាចទាក់ទងមេបញ្ជាការយោធាប្រចាំតំបន់នោះ ដើម្បីសុំការបំភ្លឺ ជុំវិញការចោទប្រកាន់របស់ប្រជាពលលរដ្ឋ បានថាយ៉ាងណានៅឡើយ។
កាលពីសប្ដាហ៍មុន ក្រុមប្រជាពលរដ្ឋបានដាក់ពាក្យបណ្ដឹង ចំពោះករណីហិង្សារបស់កងទាហាននេះ មកសមាគមការពារសិទ្ធិមនុស្សអាដហុក ដើម្បីឱ្យជួយរកយុត្តិធម៌ និងដោះស្រាយ។
អ្នកស៊ើបអង្កេតរបស់សមាគមការពារសិទ្ធិមនុស្សអាដហុក ខេត្តសៀមរាប លោក សួស ណារិន មានប្រសាសន៍ថា កាលពីថ្ងៃទី១៦ ខែឧសភា កន្លងទៅ គឺលោកបានចុះស៊ើបអង្កេតករណីនោះ ហើយរកឃើញថា កងទាហាន ពិតជាបានដុតបំផ្លាញផ្ទះប្រជាពលរដ្ឋ ១គ្រួសារ ក្នុងរឿងទំនាស់ដីធ្លីទីនោះមែន។ លោក សួស ណារិន បញ្ជាក់ទៀតថាតាមការស្រាវជ្រាវរបស់លោក រកឃើញថា អ្នកភូមិជាង១០០គ្រួសារ បានចូលទៅកាន់កាប់ដីទីនោះ តាំងតែពីអំឡុងឆ្នាំ២០០២ ក៏ប៉ុន្តែទាហាន ទើបតែស្នើសុំកាន់កាប់កាលពីឆ្នាំ២០០៧។
មន្ត្រីសាលាខេត្តសៀមរាប ឆ្លើយតបថា៖ គេពុំទាន់បានដឹងអំពីការប្រឈមមុខដាក់គ្នា រវាងប្រជាពលរដ្ឋភូមិអូរផ្អាវ ជាមួយកងទាហាននោះទេ។
អភិបាលរងខេត្តសៀមរាប លោក ប៊ុន ថាឬទ្ធិ មានប្រសាសន៍ថា បញ្ហាដែលទើបតែកើតមានរវាងប្រជាពលរដ្ឋ និងកងទាហាន កាលពីពេលថ្មីៗគឺលោកពុំទាន់បានទទួលព័ត៌មានអ្វីទេ ក៏ប៉ុន្តែលោកដឹងថាបញ្ហាដីធ្លីនៅទីនោះ គឺកើតមានជាយូរមកហើយ ដោយសាលាខេត្តក៏កំពុងរៀបចំដីធ្លីជូនអ្នកភូមិទាំងនោះ ឱ្យទៅរស់នៅម្ដុំភូមិត្រពាំងក្រសាំង ជាមួយប្រជាពលរដ្ឋ មួយភូមិទៀត។
លោក ប៊ុន ថាឬទ្ធិ បញ្ជាក់ថា៖ ប្រជាពលរដ្ឋនៅភូមិអូរផ្អាវ នោះបានចូលទៅកាន់កាប់ដី ដែលពាក់ព័ន្ធ និងតំបន់យោធាហ្វឹកហាត់បាញ់ស៊ីប។ លោកអភិបាលរងបញ្ជាក់ថា ទោះយ៉ាងណាសាលាខេត្តនឹងដោះស្រាយរកដីជូនប្រជាពលរដ្ឋ ក៏ប៉ុន្តែមិនមែនជាដីដែលពួកគេរស់នៅនិងធ្វើកសិកម្ម ពេលបច្ចុប្បន្ននេះទេ៖ «យើងដូចជាមិនអាចឱ្យគាត់បានទេ ពីព្រោះកន្លែងហ្នឹង ជាកន្លែងសម្រាប់កងទ័ព ហាត់ហ្វឹកហ្វឺន។ ប៉ុន្តែចាំមើលថ្ងៃច័ន្ទ ស្អែកខ្ញុំឱ្យស្រុកគេរាយការណ៍ ធ្ងន់ធ្ងរអីយ៉ាងម៉េច គឺទៅសម្របសម្រួលគ្នា ដោះស្រាយជាបណ្ដើរៗទៅ»។
បណ្ដឹងរបស់ប្រជាពលរដ្ឋ ដែលដាក់ជូនអង្គការសិទ្ធិមនុស្សក្រៅរដ្ឋាភិបាល បញ្ជាក់ថា បច្ចុប្បន្នមានអ្នកភូមិប្រមាណ១០៧គ្រួសារ កាន់កាប់ដីចំនួនជាង៤០០ហិកតារ ដែលកំពុងតែមានជម្លោះជាមួយទាហាន៕
ពិព័រណ៌ពាណិជ្ជកម្មថៃ រយៈពេល៤ថ្ងៃ នៅកោះពេជ្រទទួលបានជោគជ័យ
ភ្នំពេញ៖ ពិព័រណ៍ពាណិជ្ជកម្មថៃ រយៈពេល៤ថ្ងៃ ចាប់ពីថ្ងៃទី១៥ ដល់ថ្ងៃទី១៨ខែ ឧសភា ឆ្នាំ២០១៤ នៅមជ្ឈមណ្ឌលកោះពេជ្រ ទទួលបានជោគជ័យ ដោយមានការជ្រោមជ្រែងពី រដ្ឋមន្រ្តីក្រសួងពាណិជ្ជកម្មកម្ពុជា និងក្រសួងពាណិជ្ជកម្មថៃ ដែលមានក្រុមហ៊ុនចំនួន១៩០ ត្រូវនឹងស្តង់ចំនួន២១០ស្តង់។
លោក កឹមស៊ីថន រដ្ឋលេខាធិការ ក្រសួងពាណិជ្ជកម្ម មានប្រសាសន៍ថា ការខិតខំប្រឹងប្រែងរៀបចំ ពិព័រណ៍ពាណិជ្ជកម្ម របស់បណ្តា ស្ថាប័នឯកជន និង រដ្ឋ ទាំងក្នុងនិងក្រៅប្រទេសនៅលើទឹកដីកម្ពុជា គឺនៅក្នុងបរិយាកាសមួយ ដែលសេដ្ឋកិច្ចកម្ពុជា កំពុងមានការអភិវឌ្ឈន៍ដ៏ល្អប្រសើរ ជាពិសេសស្ថេរភាពនៅក្នុងប្រទេសកម្ពុជា និងការអភិវឌ្ឈន៍សេដ្ឋកិច្ច ពោល គឺស្ថេរភាពម៉ាក្រូសេដ្ឋកិច្ច ស្ថេរភាពសង្គម និងការរក្សាបាននូវលំនិង ជីវភាពរបស់ប្រជាជនកម្ពុជា។
ប៉ុន្មានឆ្នាំចុងក្រោយនេះ វិស័យពាណិជ្ជកម្ម បានក្លាយជាមួលដ្ឋានគ្រឹះនៅក្នុង របៀបវារៈ នៃកម្មវិធីអភិវឌ្ឈន៍ប្រទេសជាតិ ហើយគំនិតផ្តូចផ្តើម និង ត្រូវបានលើកឡើងសម្រាប់ការអនុវត្តន៍ ដោយក្រសួងពាណិជ្ជកម្ម និងក្រសួងពាណិជ្ជកម្មដទៃទៀត ព្រមទាំងសហគមន៍អន្តរជាតិជាច្រើន សំដៅរួមដៃគ្នាតាក់តែង ឡើងនូវគោលនយោបាយ និងយុទ្ធសាស្រ្តជាច្រើន ដើម្បីជួយដល់ការធ្វើពាណិជ្ជកម្ម និងវិនិយោគជំរុញកំណើនសេដ្ឋកិច្ចជំរុញការផ្តល់ការងារធ្វើ បង្កើតឡើងនូវប្រភពចំនូលថ្មីៗ និងប្រយុទ្ធប្រឆាំង និងភាពក្រីក្ររបស់ប្រជាជន ។
លោកបានបន្តថា ការរៀបចំ “ពិព័រណ៍ អ៊ីនធើ ដេ្រត ហ៊ែរ ២០១៤ នេះមានក្រុមហ៊ុន ចំនួន ១៩០ និងមានស្តង់ចំនួន២១០ ស្តង់ ហើយមាន ទំនិញភាគច្រើន គឺមកពីថៃ ដែលសម្បូរទៅដោយ ម្ហូបអាហារ សម្ភារៈប្រើប្រាស់ គ្រឿងសម្អាង សំលៀកបំពាក់ ដែល ផលិតផលទាំងអស់នេះសិទ្ធសឹងមានគុណភាព ប្រកបដោយ ដោយស្តង់ដារដែលអាចឆ្លើយតប និងតម្រូវការទីផ្សារកម្ពុជា នាពេលបច្ចុប្បន្ន។
លោកក៏សូមសំដែងការកោតសសើរចំពោះក្រុមហ៊ុន ប្រតវវេ ស៊ិននើជី លីមីតធីត កម្ពុជា និងស្ថានទូតថៃ ប្រចំាកម្ពុជា រួមទំាបណ្តាស្ថាប័ន និងអង្កភាពដែលពាក់ព័ន្ធទាំងអសនៅកម្ពុជា ដែលបានខិតខំប្រឹងប្រែង ធ្វើឲ្យព្រឹត្តិការណ៍”ពិព័រណ៍អ៊ីនធើដ្រេតហ៊ែ្វរ ឆ្នាំ2014”នេះអាចទទួលបានជោកជ័យ។
លោក កឹម ស៊ីថន បន្ថែមថា បច្ចុប្បន្នវិស័យពាណិជ្ជកម្ម កម្ពុជា កំពុងដើរតួរយ៉ាងសកម្មក្នុងការលើកស្ទួយ និងជំរុញកំណើរសេដ្ឋកិច្ចកម្ពុជា ដោយបង្ហាញឲ្យឃើញពីសកម្មភាពរីកចម្រើន របស់ខ្លួន តាមរយៈតួរលេខកំណើននំាចេញ និងនំាចូលក្នុងឆ្នាំ ២០១២ មានទឹកប្រាក់សរុបប្រមាណ ១៣.២៦ ពាន់លានដុល្លារ គឺមានកំណើន ១០.៦% បើធៀបនឹងឆ្នាំ ២០១១ ។
ក្នុងឆ្នាំ ២០១៣ កន្លងមកនេះ យើងឃើញសកម្មភាពពាណិជ្ជកម្មនៅកម្ពុជា មានសន្ទុះកាន់តែល្អប្រសើរបើធៀបទៅបណ្តាឆ្នាំកន្លងមក ដែលក្នុងមានតួលេខពាណិជ្ជកម្ម នំាចេញ-នំាចូលមានទឹកប្រាក់សរុប ១៦.៧៨ពាន់លានដុល្លារគឺមានកំណើន ២៣.២% ធៀបទៅនិងឆ្នាំ ២០១២ ។ ពាណិជ្ជកម្មទ្វេភាគីកម្ពុជា និង ថៃ ក៏មានការរីកចម្រើន គួឲ្យគត់សម្កាល់ ជាក់ស្តែងឆ្នាំ ២០១២តួលេខពាណិជ្ជកម្ម រវាងប្រទេសទាំងពីរ មានទឹកប្រាក់ សរុបប្រមាណ ៤.០ ពាន់លានដុល្លារ។
នៅឆ្នាំ ២០១៣ តួលេខពាណិជ្ជកម្ម កម្ពុជានិងថៃ មានទឹកប្រាក់ប្រហែល៤.៥០ពាន់លានដុល្លារ។ កំណើនតួលេខពាណិជ្ជកម្ម ជាលក្ខណៈទ្វេភាគី និងពហុភាគី ជាការបង្ហាញឲ្យឃើញពី វិស័យពាណិជ្ជកម្ម កម្ពុជា ពិតជាកំពុង មានការរីកចម្រើន ហើយវាក៏ជាក្តីសង្ឃឹមមួយសម្រាប់សេដ្ឋកិច្ចកម្ពុជា នឹងការរីកចម្រើនតយ៉ាងឆាប់រហ័ស នាពេលអនាគត៕
ចិនជម្លៀសជនជាតិខ្លួនថែមទៀតហើយផ្អាកគម្រោងផ្លាស់ប្តូរមួយចំនួនជាមួយវៀតណាម
យោងតាមសេចក្តីប្រកាសមួយរបស់ក្រសួងការបរទេសចិនថា ជនជាតិចិន២៩០នាក់ថែមទៀត ដែលរងការប៉ះពាល់ដោយសារការបះបោរប្រឆាំងចិននៅវៀតណាមបានមកដល់ព្រលានយន្តហោះក្រុងចេងឌូ ភាគនិរតីចិន កាលពីរសៀលថ្ងៃទី១៨ ឧសភា ។មនុស្សទាំងនោះត្រូវបានធ្វើមាតុភូមិនិវត្តន៍តាមយន្តហោះ២គ្រឿងរបស់ក្រុមហ៊ុនអាកាសចរណ៍ចិន SOUTHERN AIRLINES ដែលជួលដោយរដ្ឋាភិបាលចិន ។ ក្នុងចំណោមជនជាតិចិនទាំងនោះ១៣៥នាក់ជាអ្នករបួសដោយសារអំពើហិង្សានាពេលថ្មីៗនេះ ប្រឆាំងបណ្តាសហគ្រាសចិននិងពលរដ្ឋចិនដែលមានវត្តមាននៅវៀតណាមក្នុងនោះរួមមានបុគ្គលិកនៃក្រុមហ៊ុនស្លដែកចិន CHINA METALL-URGICAL GROUP CORPORATION ផង ។
ជនជាតិចិន២នាក់បានត្រូវស្លាប់ ហើយជាង១០០នាក់ទៀតត្រូវរបួសក្នុងការបះបោរប្រឆាំងចិនដែលផ្ទុះឡើងនៅវៀតណាមកាលពីសប្តាហ៍មុន ។ក្រសួងការបរទេសចិនគូសបញ្ជាក់ កាលពីព្រឹកថ្ងៃទី១៨ ឧសភា ថា ជនជាតិចិនជាង៣.០០០នាក់ ត្រូវបានជម្លៀសចេញពីវៀតណាម កាលពីរសៀលថ្ងៃទី១៧ ឧសភា តាមនាវានិងតាមយន្តហោះ ។ក្រសួងដឹកជញ្ជូនចិនគូសបញ្ជាក់ថា ចិនបញ្ជូននាវា៥គ្រឿងទៅកាន់វៀតណាម នាថ្ងៃទី១៨ ឧសភា ដើម្បីជម្លៀសជនជាតិខ្លួន ។ នាវាដំបូងគេបានចាកចេញនាវេលាម៉ោង៨ព្រឹក ថ្ងៃទី១៨ ឧសភា ពីកំពង់ផែហៃគូ ទីប្រជុំជនខេត្តហៃណាន់ ។ នាវានោះត្រូវទៅដល់វៀតណាមក្រោយធ្វើដំណើរអស់រយៈពេលពី១៧ទៅ១៨ម៉ោង ។ នាវាជួយសង្គ្រោះមួយគ្រឿងក៏ត្រូវបានបញ្ជូនទៅកាន់ដែនទឹកទាក់ទិនដើម្បីជួយទ្រទ្រង់ក្នុងករណីជួបហេតុការណ៍បន្ទាន់ ចំណែកនាវាសង្គ្រោះមួយទៀតព្រមទាំងឧទ្ធម្ភាគចក្រ១គ្រឿងត្រៀមចាកចេញបន្ត ។
ចំណែកអ្នកនាំពាក្យក្រសួងការបរទេសចិនលោកហុងឡី អះអាងកាលពីថ្ងៃទិ១៨ ឧសភា ថា ប្រទេសចិននឹងផ្អាកគម្រោងផ្លាស់ប្តូរទ្វេភាគីមួយផ្នែកជាមួយវៀតណាមជាការឆ្លើយតបចំពោះអំពើហិង្សាបង្ហូរឈាមប្រឆាំងជនជាតិខ្លួននៅវៀតណាម ។យោងតាមលោកហុងឡីថា ចិនបានបង្កើនកម្រិតប្រកាសអាសន្នសន្តិសុខសម្រាប់បណ្តាអ្នកទេសចរចិននៅវៀតណាមដោយស្នើដល់ពលរដ្ឋខ្លួនកុំឱ្យធ្វើដំណើរទៅកាន់ប្រទេសនោះ ។
អ្នកនាំពាក្យរូបនេះគូសបញ្ជាក់ថា អំពើហិង្សាយា៉ងធ្ងន់ធ្ងរប្រឆាំងបណ្តាសហគ្រាសបរទេសនៅវៀតណាម ចាប់តាំងពីថ្ងៃទី១៣ ឧសភា មក បណ្តាលឱ្យមនុស្សជាច្រើននាក់ត្រូវរបួស ហើយក៏ញាំុងឱ្យបណ្តាពលរដ្ឋចិនរងការបាត់បង់សម្ភារយា៉ងច្រើនផងដែរ ដែលជាការបំផ្លាញបរិយាកាស និងលក្ខខណ្ឌសម្រាប់ការទាក់ទងគ្នា និងកិច្ចសហប្រតិបត្តិការ ។ លោកបន្តថាចិនមានបំណងចាត់វិធានការនានាថែមទៀតយោងទៅតាមការវិវត្តន៍នៃសភាពការណ៍ ៕
ប្រភព:កោះសន្តិភាព
ជម្លោះចិននិងវៀតណាមនៅសមុទ្រចិនខាងត្បូងនៅងំ
ក្រុងហាណូយប្តូរជំហរចំពោះបាតុកម្មប្រឆាំងចិន
កាលពីព្រឹកថ្ងៃអាទិត្យ មានការពង្រឹងសន្តិសុខយ៉ាងខ្លាំងនៅខាងក្រៅស្ថានទូតចិនក្នុងទីរដ្ឋធានីហាណូយ ហើយសួនច្បារមួយកន្លែងដែលបាតុករបានប្រើជាកន្លែងតវ៉ាកាលពីសប្តាហ៍មុនត្រូវបានគេបិទ។
បាតុករចំនួនតិចតូចដែលបានចេញមកតវ៉ា ត្រូវក្រុមប៉ូលិសឡោមព័ទ្ធនិងព្យាយាមមិនឲ្យពួកគេអាចនិយាយជាមួយក្រុមអ្នកកាសែតបាន។ លោក ឡេ ធៀង ញិន (Le Thien Nhan) ដែលបានចូលរួមធ្វើបាតុកម្មប្រឆាំងចិនជាទៀងទាត់ក្នុងពេលកន្លងមក ក៏មានវត្តមាននៅថ្ងៃនេះដែរ។
លោក ញិន (Nhan) ថ្លែងថា មិត្តភក្តិរបស់លោកជាច្រើននាក់ក៏ចង់ចូលរួមបាតុកម្មថ្ងៃអាទិត្យនេះដែរ ប៉ុន្តែត្រូវប៉ូលិសរារាំងមិនឲ្យចេញពីផ្ទះ។
បាតុករជាច្រើននាក់នៅទីក្រុងហូជីមិញត្រូវប៉ូលិសចាប់ខ្លួន។ នៅទីក្រុងហាណូយ បាតុករអាយុ២២ឆ្នាំម្នាក់ត្រូវប៉ូលិសស្លៀកពាក់ស៊ីវិលរុញច្រានក្នុងពេលលោកកំពុងនិយាយជាមួយវីអូអេ ហើយនៅទីបំផុតប៉ូលិសបានទាញលោកនិងមិត្តភក្តិចេញ។
ស្រ្តីជាមន្ត្រីប៉ូលិសមួយរូបថ្លែងថាការប្រមូលផ្តុំទាំងនេះ«ខុសច្បាប់»។
នេះជាការប្រែប្រួលគោលជំហរយ៉ាងខ្លាំងរបស់រដ្ឋាភិបាលវៀតណាម ដែលទើបតែបានអនុញ្ញាតឲ្យមានបាតុកម្មទ្រង់ទ្រាយធំនៅទូទាំងប្រទេសកាលពីសប្តាហ៍មុន។ ក៏ប៉ុន្តែក្នុងសប្តាហ៍កន្លងទៅនេះ បាតុកម្មទាំងនោះនាំឲ្យមានកុប្បកម្មកើតឡើងនៅតំបន់សួនឧស្សាហកម្មនៅប៉ែកខាងត្បូងនិងកណ្តាលប្រទេសវៀតណាម ដែលបានបណ្តាលឲ្យកម្មករចិនពីរនាក់ត្រូវសម្លាប់និងមនុស្សប្រមាណ១០០ទៀតរបួស។
អ្នកសង្កេតការណ៍ខ្លះសង្ស័យថាកុប្បកម្មទាំងនេះបានកើនសម្ទុះដោយសារកំហឹងទាក់ទងនឹងស្ថានភាពការរស់នៅមិនល្អនៅក្នុងរោងចក្រ ជាជាងអារម្មណ៍ប្រឆាំងនឹងចិន។
នៅក្នុងសន្និសីទព័ត៌មានមួយកាលពីថ្ងៃសៅរ៍អំពីបញ្ហាកុប្បកម្មនេះ មន្ត្រីវៀតណាមព្យាយាមធានាដល់អ្នកវិនិយោគ។ ក្រុមមន្ត្រីថ្លែងថា ស្ថានភាពមានភាពរៀបរយឡើងវិញហើយ ហើយក្រុមហ៊ុនដែលរងការប៉ះពាល់នឹងត្រូវទទួលសំណងចំពោះការខាតបង់។
ឧត្តមសេនីយ៍ឯក ហ៊័ង កុង ទឺ (Hoang Kong Tu) ប្រធាននាយកដ្ឋានស៊ើបអង្កេតនៃក្រសួងសន្តិសុខសាធារណៈថ្លែងប្រាប់អ្នកយកព័ត៌មានថា មនុស្សរាប់រយនាក់ត្រូវចាប់ខ្លួន។
ក្រសួងសន្តិសុខសាធារណៈត្រូវគេរិះគន់ថាបានចាត់វិធានការយឺតយ៉ាវពេក ប៉ុន្តែលោក Tu ថ្លែងថា វិធានការឆ្លើយតបរបស់រដ្ឋាភិបាលគឺ«ទាន់ពេល»។ លោកថា រដ្ឋាភិបាលបានឆ្លើយតបក្នុងរបៀបសកម្មនិងរហ័សដើម្បីកាត់បន្ថយការខាតបង់។
ជម្លោះទាក់ទងនឹងការណ៍ដែលចិនចាប់ខួងប្រេងនេះ ហាក់មិនថមថយឡើយ។ វៀតណាមនិយាយថា ចិនបានបង្កើននាវានៅក្នុងតំបន់សមុទ្រនោះរហូតដល់ចំនួន១៣០គ្រឿង ដោយរួមមាននាវាកងទ័ពជើងទឹកចំនួន៤គ្រឿងផងដែរ។
ទីភ្នាក់ងារព័ត៌មាន Xinhua ផ្លូវការរបស់ចិនបានរាយការណ៍ថា ប្រទេសចិនបានជម្លៀសពលរដ្ឋរបស់ខ្លួនចំនួនជាង៣.០០០នាក់ចេញពីប្រទេសវៀតណាមនៅក្រោយពេលមានកុប្បកម្មនេះ។
កាលពីថ្ងៃសៅរ៍ លោកនាយករដ្ឋមន្ត្រី ង្វៀង តាន យុង (Nguyen Tan Dung) បានផ្ញើសារជាច្រើនតាមទូរស័ព្ទទៅអ្នកប្រើប្រាស់បណ្តាញទូរស័ព្ទរដ្ឋ ដោយអំពាវនាវឲ្យពួកគេសម្តែងអារម្មណ៍ជាតិនិយម ប៉ុន្តែមិនឲ្យចូលរួមក្នុងបាតុកម្ម«ខុសច្បាប់»។ សារដំបូងត្រូវបានផ្ញើចេញកាលពីថ្ងៃព្រហស្បតិ៍។
គេនៅមិនដឹងច្បាស់ថាបាតុកម្មបែបណាដែលជាបាតុកម្ម«ខុសច្បាប់»នោះ។ ប៉ុន្តែសារដែលចេញពីសកម្មភាពបង្ក្រាបក្រុមប៉ូលិសកាលពីថ្ងៃអាទិត្យបង្ហាញថា រដ្ឋាភិបាលនឹងមិនអនុញ្ញាតឲ្យមានបាតុកម្មប្រឆាំងនឹងចិនបន្តទៀតក្នុងពេលឆាប់ៗខាងមុខទេ៕
ប្រភព:វីអូអេ
Subscribe to:
Posts (Atom)