Wednesday, May 14, 2014
កម្មកររោងចក្រជាច្រើននាក់នៅក្រុងបាវិតត្រូវថៅកែបញ្ឈប់ពីការងារ
កម្មកររោងចក្រនៅតំបន់សេដ្ឋកិច្ច មេនហាតធេន (Manhattan) នៅក្រុងបាវិត ខេត្តស្វាយរៀង ជាច្រើននាក់ ត្រូវថៅកែរោងចក្របញ្ឈប់ពីការងារ។ ក្រុមកម្មករបញ្ជាក់ថា ដើមចមដែលនាំឲ្យថៅកែបញ្ឈប់ពួកគេពីការងារនេះ ដោយចោទប្រកាន់ថា មានជាប់ពាក់ព័ន្ធករណីបង្កវឹកវរក្នុងរោងចក្រ គ្រាដែលកម្មករធ្វើកូដកម្មកាលពីចុងខែមេសា កន្លងទៅ។
អង្គការសង្គមស៊ីវិល ចាត់ទុកការបញ្ឈប់កម្មករនោះ ថាជារឿងអយុត្តិធម៌មកលើកម្មករ ដើម្បីរារាំងមិនឲ្យពួកគេធ្វើកូដកម្មតវ៉ានាពេលក្រោយទៀត។
ក្រុមកម្មករសម្ដែងការមិនពេញចិត្តទៅនឹងចំណាត់ការរបស់ថៅកែរោងចក្រ ដែលបញ្ឈប់ពួកគេពីការងារដោយពុំមានកំហុសអ្វី ផ្ទុយពីលក្ខខណ្ឌ ឬច្បាប់ការងារឡើយ។
តំណាងកម្មករដែលថៅកែរោងចក្របញ្ឈប់ពីការងារ លោក សេក ម៉ូ ឲ្យដឹងនៅថ្ងៃទី១៤ ឧសភា ថា ថៅកែរោងចក្របញ្ឈប់ពួកគេពីការងារជាបន្តបន្ទាប់ តាំងពីថ្ងៃទី១២ ឧសភា រហូតមក ដោយចោទប្រកាន់កម្មករថា បង្កភាពវឹកវរបំផ្លាញទ្រព្យសម្បត្តិរោងចក្រ គ្រាដែលធ្វើកូដកម្មតវ៉ាជាមួយរោងចក្រកាលពីខែឧសភា កន្លងទៅ។
លោក សេក ម៉ូ បញ្ជាក់ថា ពួកគេពុំបានធ្វើអ្វីខុសច្បាប់នោះទេ គឺគ្រាន់តែចូលរួមធ្វើកូដកម្មទាមទារឲ្យថៅកែរោងចក្រផ្ដល់ប្រាក់អត្ថប្រយោជន៍ការងារកម្មករម្នាក់ ៥០ដុល្លារ ដែលបានសន្យាឲ្យកម្មករនាពេលកន្លងទៅ៖ «គេបញ្ឈប់ដោយចិត្តរបស់គេតែហ្មង អត់មានពីណាដោះស្រាយឲ្យផង។ សូម្បីតែខ្ញុំមិនបានគប់អីផង ចោទខ្ញុំថាខ្ញុំហ្នឹងមានរូបនៅក្នុងកាមេរ៉ា ចោទប្រកាន់ខ្ញុំវាយរោងចក្រវាយមនុស្ស តាមការពិតពួកសន្តិសុខតំបន់មកវាយកម្មករវិញទេ។ មិនមែនមកចោទថា ពួកខ្ញុំមកវាយកម្មករ។ ចោទកម្មករ គាបសង្កត់កម្មករ អត់មានការយុត្តិធម៌សោះ»។
មន្ត្រីសម្ព័ន្ធសហជីពចលនាកម្មករ លោក មាស សុខណា ឲ្យដឹងថា រហូតមកទល់ពេលនេះ មានកម្មករប្រមាណ ៤០នាក់ហើយដែលថៅកែរោងចក្របញ្ឈប់ពីការងារ។ លោកថា កម្មករដែលបញ្ឈប់ភាគច្រើន ជាកម្មកររោងចក្រកាត់ដេរ រោងចក្រដំឡើងកង់ និងរោងចក្រផលិតអំពូលភ្លើង នៅតំបន់សេដ្ឋកិច្ចពិសេស មេនហាតធេន។ លោក មាស សុខណា ពន្យល់ថា ជាទូទៅនៅពេលដែលធ្វើកូដកម្មម្ដងៗ ថៅកែរោងចក្រតែងតែបញ្ឈប់កម្មករបន្តបន្ទាប់ ដោយយកលេសថា មានកំហុសការងារមិនអាចបន្តកិច្ចសន្យាបានឡើយ៖ «ព្រោះបើសិនជាកម្មករគាត់ធ្វើការមិនបានល្អពីដំបូង គាត់អត់ព្រមបញ្ឈប់ទេ ក៏ប៉ុន្តែនៅពេលដែលកម្មករខ្លះគាត់ធ្វើការរាប់ឆ្នាំមកហើយ ២ឆ្នាំ ៣ឆ្នាំមកហើយ។ នៅពេលអំឡុងពេលកូដកម្មឡើង ចូលទៅវិញបញ្ឈប់គាត់ ដោយសារក្រុមហ៊ុនមិនបន្តកិច្ចសន្យាដល់អ្នកឯងទៀតទេ។ អ៊ីចឹងក្រុមហ៊ុនត្រូវបញ្ឈប់។ អ៊ីចឹងខ្ញុំអត់យល់ពីវិធីសាស្ត្រក្នុងការគ្រប់គ្រងរបស់ក្រុមហ៊ុន ខ្ញុំអត់យល់បង!»។
វិទ្យុអាស៊ីសេរី ពុំអាចទាក់ទងមន្ត្រីតំបន់សេដ្ឋកិច្ចពិសេស មេនហាតធេន និងមន្ត្រីមន្ទីរការងារខេត្តស្វាយរៀង បានទេ នៅថ្ងៃទី១៤ ឧសភា។
តែយ៉ាងណា កន្លងមកអនុប្រធានមន្ទីរការងារ និងបណ្ដុះបណ្ដាលវិជ្ជាជីវៈ ខេត្តស្វាយរៀង លោក អ៊ូ សុខឿន ធ្លាប់មានប្រសាសន៍ថា ក្រុមហ៊ុនបញ្ឈប់កម្មករពីការងារ ដោយសារការងាររបស់កម្មករដែលបញ្ឈប់កន្លងមកពុំមានប្រសិទ្ធភាព ទើបក្រុមហ៊ុនមិនបន្តកិច្ចសន្យាការងារឲ្យកម្មករ។
មន្ត្រីសម្របសម្រួលអង្គការលីកាដូ (Licadho) ប្រចាំខេត្តស្វាយរៀង លោក នុត បូពិណារ័ត្ន ចាត់ទុកការបញ្ឈប់កម្មករពីការងាររបស់ថៅកែរោងចក្រនេះ ថាជារឿងអយុត្តិធម៌ រំលោភសិទ្ធិការងាររបស់កម្មករដោយខុសច្បាប់របស់កម្ពុជា។ លោក នុត បូពិណារ័ត្ន បញ្ជាក់បន្ថែមថា ថៅកែរោងចក្របញ្ឈប់កម្មករពីការងារ ភាគច្រើនជាកម្មករដែលតវ៉ាសកម្មជាមួយក្រុមហ៊ុន៖ «ក្នុងករណីហ្នឹងជាករណីមួយដែលរំលោភទៅលើច្បាប់កម្មករ រំលោភលើច្បាប់ការងាររបស់កម្មករ រំលោភទៅលើសិទ្ធិបុគ្គលរបស់ពួកគាត់ ដែលគាត់ទទួលបានការងារ។ ហើយតែរោងចក្របញ្ឈប់ពួកគាត់ អ៊ីចឹងវាអាចមានបញ្ហាទៅលើកម្មករដទៃទៀត ដែលយើងបញ្ឈប់ស្រេចតែចិត្ត អ៊ីចឹងបញ្ឈប់ដោយសំអាងថា គាត់មានកាមេរ៉ាមានអីអ៊ីចឹង យើងមិនមានហេតុផលអាចបញ្ឈប់គាត់បានទេបាទ!»។
កាលពីចុងខែមេសា កន្លងទៅ ក្រុមកម្មករធ្លាប់បានធ្វើកូដកម្មទាមទារប្រាក់អត្ថប្រយោជន៍ការងារជាមួយរោងចក្រ។ កម្មករបញ្ជាក់ថា កាលណោះថៅកែរោងចក្រសន្យាផ្ដល់ប្រាក់ឲ្យកម្មករម្នាក់ ៥០ដុល្លារអាមេរិក បើកម្មករមិនចូលរួមធ្វើកូដកម្ម។ ពួកគេមិនបានធ្វើកូដកម្មទេ តែថៅកែរោងចក្របែរជាមិនបានបើកប្រាក់តាមការសន្យា។ ហើយកម្មករដែលធ្វើកូដកម្ម ត្រូវអាជ្ញាធរចាប់ដាក់ពន្ធនាគារ។ ក្រោយមកក្រុមហ៊ុនចាប់ផ្ដើមបញ្ឈប់កម្មករជាបន្តបន្ទាប់ ដោយចោទប្រកាន់ថា បំផ្លាញទ្រព្យសម្បត្តិរោងចក្រ ហើយបានបញ្ចប់កិច្ចសន្យាការងារ៕
Subscribe to:
Post Comments (Atom)
No comments:
Post a Comment