ភ្នំពេញ: បណ្ឌិតអូន ព័ន្ធមុនីរ័ត្ន រដ្ឋមន្ដ្រីក្រសួងសេដ្ឋកិច្ច និងហិរញ្ញវត្ថុ បាននិយាយថា ទំនាក់ទំនងពាណិជ្ជកម្ម និងវិនិយោគរវាងប្រទេសកម្ពុជានិង ឥណ្ឌូណេស៊ីនៅមានកម្រិតទាបនៅ ឡើយ ដែលទាមទារឱ្យប្រទេសទាំងពីរ ពង្រឹងទំនាក់ទំនងទ្វេភាគីលើវិស័យ ពាណិជ្ជកម្មវិនិយោគ និងទេសចរណ៍ ថែមទៀត។
លោករដ្ឋមន្ដ្រី បាននិយាយ បែបនេះក្នុងពេលទទួលជួបជាមួយ លោកពីតូណូ ពួរណូម៉ូ ឯកអគ្គរដ្ឋទូតសាធារណរដ្ឋ ឥណ្ឌូណេស៊ីប្រចាំកម្ពុជាកាលពីថ្ងៃទី១២ ខែឧសភា ឆ្នាំ២០១៤នេះ ។ លោក បញ្ជាក់ថា ទំនាក់ទំនងពាណិជ្ជកម្មរវាង ភាគីទាំងពីរមានទំហំពាណិជ្ជកម្មសរុប ប្រហាក់ប្រហែល ៣០០ លានដុល្លារ តែប៉ុណ្ណោះ ។ ទំហំពាណិជ្ជកម្មតម្លៃ នេះមានកម្រិតទាបនៅឡើយ បើធៀប នឹងសក្ដានុពលដែលប្រទេសទាំងពីរ មាន។ លោករដ្ឋមន្ដ្រីបានជម្រាបលោក ឯកអគ្គរដ្ឋទូតថា កំណើនសេដ្ឋកិច្ចកម្ពុជា នៅឆ្នាំ២០១៣ សម្រេចបានក្នុងអត្រា៧,៣ ភាគរយ។
លោករដ្ឋមន្ដ្រីមានប្រសាសន៍ ដែរថា ដោយសារទំនាក់ទំនងពាណិជ្ជកម្ម និងវិនិយោគរវាងប្រទេសទាំងពីរ នៅមានកម្រិតទាប ហើយដោយសារ ប្រទេសឥណ្ឌូណេស៊ីក៏ជាប្រភព វិនិយោគ ដោយផ្ទាល់ពីបរទេសមួយធំ នៅក្នុងតំបន់អាស៊ានដែរនោះកម្ពុជា ស្នើសុំឱ្យលោកឯកអគ្គរដ្ឋទូតជួយជំរុញ វិនិយោគិនឥណ្ឌូណេស៊ីមកបណ្ដាក់ទុន នៅក្នុងប្រទេសកម្ពុជា ឱ្យបានច្រើន ថែមទៀត។
លោកឯកអគ្គរដ្ឋទូត បាន សន្យាកៀរគរវិនិយោគិនឥណ្ឌូណេស៊ី មកបណ្ដាក់ទុននៅកម្ពុជាបន្ថែមទៀត ហើយបានសន្យាពង្រឹងកិច្ចសហប្រតិបត្ដិការលើវិស័យពាណិជ្ជកម្មវិនិយោគ និងទេសចរណ៍ និងជំរុញឱ្យមានកិច្ច សហប្រតិបត្ដិការលើវិស័យពាណិជ្ជកម្ម វិនិយោគ និងទេសចរណ៍ឱ្យបានខ្លាំងក្លា បន្ថែមទៀតរវាងគ្នា ៕
ប្រភព :កោះសន្តិភាព
No comments:
Post a Comment