អាជីវករលក់ដូរនៅប៉ែកខាងត្បូង និងខាងជើងនៃផ្សារលើ ខេត្តកំពង់ឆ្នាំង ខកចិត្តចំពោះភាពមិនច្បាស់លាស់របស់អាជ្ញាធរ ក្នុងការអនុវត្តគម្រោងស្ថាបនាប្រព័ន្ធលូបង្ហូរទឹកស្អុយ ដែលធ្វើនៅចំទីតាំងតូបលក់ដូររបស់ពួកគាត់។
ក្រុមអាជីវករអះអាងថា អាជ្ញាធរ និងគណៈកម្មការផ្សារ ម្ដងបង្ខំឲ្យពួកគាត់រុះរើតូបចេញ ដើម្បីចាប់ផ្ដើមអនុវត្ដគម្រោងនេះ ម្ដងត្រូវពន្យារពេល។ ភាពមិនច្បាស់លាស់នេះ ធ្វើឲ្យប៉ះពាល់ដល់ការលក់ដូរ និងជីវភាពរស់នៅប្រចាំថ្ងៃរបស់ពួកគាត់ធ្ងន់ធ្ងរ។
ដំបូលឆត្រ និងគ្រែលក់ដូររបស់អាជីវករប្រមាណជា ៤០០កន្លែង ត្រូវបានរុះរើជាលើកទី២ នៅថ្ងៃទី១៥ ខែឧសភា បន្ទាប់ពីពួកគាត់សម្រេចចិត្តនាំគ្នាចូលទៅលក់ដូរនៅកន្លែងចាស់មួយរយៈវិញ។ ការសម្រេចចិត្តចូលទៅលក់ដូរនៅលើទីតាំងចាស់ ដែលអាជ្ញាធរឲ្យរុះតូបចោលអស់ម្តងហើយនោះ គឺដោយសារតែមិនឃើញគ្រឿងចក្ររបស់គម្រោង ចៃកា (Jica) ធ្វើសកម្មភាពស្ដារប្រព័ន្ធលូដូចគម្រោង និងការប្រកាសរបស់អាជ្ញាធរនោះឡើយ។
អាជីវករលក់បន្លែ និងសាច់ជ្រូក ដែលថ្លែងក្នុងលក្ខខណ្ឌសុំមិនបញ្ចេញឈ្មោះ ឲ្យដឹងថា ភាពរអាក់រអួលនៃការលក់ដូរបានកើតមានតាំងពីពេលរុះរើ នៅថ្ងៃទី១ ខែឧសភា មក។ ពួកគាត់បន្តថា ប្រសិនគម្រោងធ្វើលូនេះនៅតែបន្តអូសបន្លាយ ខណៈដែលកន្លែងលក់ដូររបស់ពួកគាត់មិនច្បាស់លាស់ដូចសព្វថ្ងៃនេះ បញ្ហាជីវភាពរបស់អាជីវករនឹងកាន់តែប៉ះពាល់ខ្លាំង៖ «លំបាកហ្នឹងវាក្រៃណានឹងនិយាយ ដល់យើងនិយាយ ដល់យើងធ្វើអ៊ីចឹងៗ វាដូចជាអត់សម។ បើថាដេញចេញឲ្យវាចេញទៅកុំអាដែងចេញហើយចូលហើយចូលហើយទៅជាមានពាក្យចចាមអារ៉ាម ដីទៅដោះដូរជាមួយប្រជាពលរដ្ឋអាម៉េចអីអាម៉េច ហើយអាភាស៊ីកង់អីនៅត្រង់ហ្នឹងអត់ចេញ ហើយឲ្យប្រជាជនចេញ ឲ្យអាភាស៊ីកង់នៅទុកហ្នឹង។ ជួលកន្លែងគេមួយថ្ងៃគេយក ២ ទៅ ៣ពាន់មួយថ្ងៃ ក្មួយឯងគិតមើលថាយកក៏យកចុះ ឲ្យតែបានប្រជាជនធ្វើស្ដារស្អាតទៅ នឹងអាងចូលវិញ»។
ក្រោយពីការរុះរើនេះ ក្រុមអាជីវករនាំគ្នាជួលដីនៅតាមមុខផ្ទះអ្នកភូមិត្រពាំងបី ដែលស្ថិតនៅក្បែរផ្សារនោះ ដើម្បីលក់ដូរបណ្ដោះអាសន្ន ក្នុងគោលបំណងរង់ចាំចូលលក់ដូរកន្លែងដើមវិញ បន្ទាប់ស្ថាបនាប្រព័ន្ធលូរួច។ ត្រង់ចំណុចនេះ គណៈគ្រប់គ្រងផ្សារលើបញ្ជាក់ថា ក្រុមអាជីវករអាចចូលលក់នៅកន្លែងដើមវិញបាន ប៉ុន្តែមានអាជ្ញាធរខេត្តក្រុង រួមសហការជាមួយនឹងគណៈកម្មការផ្សារ ដើម្បីវាស់បែងចែកទំហំតូបស្មើៗគ្នា សម្រាប់អាជីវករជួលនៅក្រោយការសាងសង់ប្រព័ន្ធលូរួច។
ប្រធានគណៈកម្មការផ្សារលើ លោក លន់ ថា មានប្រសាសន៍ថា មូលហេតុពិតប្រាកដនៃការយឺតយ៉ាវនេះ លោកមិនដឹងថាបណ្ដាលមកពីអាជ្ញាធរ ឬខាងគម្រោង ចៃកា របស់ប្រទេសជប៉ុន នោះទេ៖ «អាហ្នឹងគាត់ចង់បាក់ជំនឿថា តិចថយដូចថ្ងៃមុនទៅ ប្រសិនបើថយទៅគេអត់ទាន់ធ្វើដដែល វាខាតគាត់ណាស់ណា ទៅលក់ឯណោះវាអត់មានអ្នកទិញអ្នកអីអ៊ីចឹងទៅ វាដាច់ជីវភាពគាត់ណាប្អូន»។
វិទ្យុអាស៊ីសេរី ពុំទាន់អាចទាក់ទងអ្នកនាំពាក្យសាលាខេត្តកំពង់ឆ្នាំង អ្នកស្រី ដោក សុទ្ធា និងអភិបាលក្រុង លោក ហៃ មនោរម្យ ដើម្បីសុំការអត្ថាធិប្បាយជុំវិញបញ្ហានេះបានទេ នៅថ្ងៃទី១៥ ខែឧសភា ប៉ុន្តែសេចក្ដីជូនដំណឹងដែលបិទផ្សាយលើគម្រោងការសាងសង់ប្រព័ន្ធលូនៅអមសងខាងផ្សារនេះ នឹងចាប់ផ្ដើមពីថ្ងៃទី១៥ ខែមិថុនា ដល់ថ្ងៃទី១៥ ខែសីហា ឆ្នាំ២០១៤ ហើយរយៈពេលនៃការក្រាលកម្រាល គឺចាប់ពីថ្ងៃទី២០ ខែកក្កដា ដល់ថ្ងៃទី៣០ ខែកញ្ញា ឆ្នាំ២០១៤៕
ប្រភព:អាស៊ីសេរី
No comments:
Post a Comment