មីយ៉ាន់ម៉ា ៖ កាលពីថ្ងៃទី១១ ឧសភា កន្លងទៅ លោកទេសរដ្ឋមន្ត្រី ស៊ុន ចាន់ថុល បានរៀបចំកិច្ចប្រជុំទ្វេភាគីជាមួយលោក Gregory So រដ្ឋមន្ត្រីក្រសួងពាណិជ្ជកម្ម និងអភិវឌ្ឍន៍សេដ្ឋកិច្ច ហុងកុង ក្នុងអំឡុងពេលនៃវេទិកាភាពជាអ្នកដឹកនាំរបស់សមាគមអាស៊ានលើកទី១១ ។ ភាគីទាំងពីរ បានពិភាក្សាផ្លាស់ប្តូរយោបល់អំពីវិធីពង្រឹងចំណងទាក់ទងសេដ្ឋកិច្ច និងពង្រីកពាណិជ្ជកម្មបន្ថែមរវាងកម្ពុជា និងហុងកុង ។
ទំហំពាណិជ្ជកម្មសរុបរវាងប្រទេសកម្ពុជា និងហុងកុង មានទឹកប្រាក់ដល់ទៅ១ពាន់លានដុល្លារសហរដ្ឋអាមេរិក ក្នុងឆ្នាំ២០១៣ កើនឡើងចំនួន១៩% ធៀបនឹងឆ្នាំ២០១២ ។ លោកទេសរដ្ឋមន្ត្រី ស៊ុន ចាន់ថុល បានស្នើឱ្យលោក Gregory So ជួយជ្រោមជ្រែងក្នុងការនាំចូលស្រូវអង្ករបន្ថែមពីប្រទេសកម្ពុជា និងលើកទឹកចិត្តពាណិជ្ជករហុងកុង ឱ្យមកវិនិយោគវិស័យស្រូវអង្ករនៅកម្ពុជា ដើម្បីជួយបង្កើនថ្លៃស្រូវអង្ករ សម្រាប់កសិករនិងផ្តល់មូលនិធិទិញស្រូវអង្ករ ក្នុងអំឡុងពេលរដូវប្រមូលផល ។
លោកទេសរដ្ឋមន្ត្រីក៏បានស្នើឱ្យលោក Gregory So ជួយពង្រីកកិច្ចសហប្រតិបត្តិការរវាងសភាពាណិជ្ជកម្មនៃប្រទេសទាំងពីរ និងបានអញ្ជើញលោក Gregory So ឱ្យដឹកនាំគណៈប្រតិភូធុរកិច្ចមកកាន់កម្ពុជា ដើម្បីស្វែងយល់អំពីកាលានុវត្តិភាពវិនិយោគ និងពាណិជ្ជកម្មនៅកម្ពុជាផងដែរ ។លោក Gregory So បានស្នើសុំការគាំទ្រពីកម្ពុជាសម្រាប់ភាពជោគជ័យនៃកិច្ចព្រមព្រៀងពាណិជ្ជកម្មសេរី អាស៊ាន-ហុងកុង ។
គណៈកម្មាធិការចរចាពាណិជ្ជកម្ម អាស៊ាន-ហុងកុង នឹងជួបប្រជុំលើកដំបូងនៅថ្ងៃទី១០-១១ កក្កដា ២០១៤ ។ លោកក៏បានអញ្ជើញលោកទេសរដ្ឋមន្ត្រី ជាផ្លូវការឱ្យដឹកនាំគណៈប្រតិភូទៅបំពេញទស្សនកិច្ចនៅហុងកុង ក្រោមកម្មវិធី Sponsored Visitors’ Program នៅមុនដំណាច់ខែមីនា ឆ្នាំ២០១៥ ហើយកម្មវិធីនេះរៀបចំឡើងដើម្បីអនុញ្ញាតឱ្យលោកទេសរដ្ឋមន្ត្រី បានជួបជាមួយមន្ត្រីរដ្ឋាភិបាលជាន់ខ្ពស់ និងពាណិជ្ជកររបស់ហុងកុង ៕
No comments:
Post a Comment