កាលណាបើប្រជាពលរដ្ឋណាម្នាក់ ឃើញនៅក្នុងសារព័ត៌មានដែលប្រកាសអំពីការកាត់កាល់ គេប្រាកដជាសម្លឹងមើលថានោះជានរណា? គេជាមនុស្សប្រុស ឬស្រី? ហើយមានមុខម៉ាត់ដូចម្ដេចខ្លះ ។ ព័ត៌មានអំពីការកាត់កាលកូន ឬសមាជិកណាម្នាក់ចេញពីក្រុមគ្រួសារដោយសារតែគេបានប្រព្រឹត្តិកំហុសធ្ងន់ធ្ងរ និងមិនអាចកែឲ្យប្រសើរឡើងវិញឡើយ។ ប៉ុន្តែការប្រកាសដែលមិនធ្លាប់លឺ ឬពុំធ្លាប់មានពីមុនមកនោះដែលសរសេរ និងបោះផ្សាយនៅក្នុងបណ្ដាញសង្គមហ្វេសប៊ុកនោះ គឺការប្រកាសកាត់កាល់នាយករដ្ឋមន្ត្រី ហ៊ុន សែន។
លិខិតកាត់កាល់ដែលសរសេរដោយក្រុមអ្នកលេងហ្វេសប៊ុកមួយចំនួន បានបដិសេធក្នុងនាមជាប្រជាពលរដ្ឋកម្ពុជាម្នាក់ៗ នឹងមិនទទួលស្គាល់ឡើយនៅពេលដែលលោក ហ៊ុន សែន យកឈ្មោះប្រជាពលរដ្ឋកម្ពុជា យកទៅខ្ចីបុលបរទេសដើម្បីយកមកកសាងហេដ្ឋារចនាសម្ព័ន្ធនានា តែបែរជាដាក់ឈ្មោះខ្លួនឯងទៅវិញ។ លិខិតដែលសរសេរបែបកំប្លុកកំប្លែងដដែល បញ្ជាក់ទៀតថាការខ្ចីបំណុលបរទេស+ដែលយកមកបម្រើឲ្យហេតុផលផ្ទាល់ខ្លួនរបស់លោកនាយករដ្ឋមន្ត្រីហ៊ុន សែន គឺមិនពាក់ព័ន្ធនឹងរូបខ្ញុំឡើយ។ ហើយខ្ញុំជាប្រជាពលរដ្ឋម្នាក់មិនទទួលស្គាល់ និងទទួលខុសត្រូវសង ចំពោះបំណុលទាំងនោះឡើយ។
អ្នកលេងហ្វេសប៊ុក មួយចំនួន ដែលបានឃើញលិខិតនោះ អ្នកខ្លះសើចដោយគិតថាតើអ្នកណាអាចទៅកាត់កាល់នាយករដ្ឋមន្ត្រី ដូចកាត់កាល់សមាជិកគ្រួសារបាននោះ។ ប៉ុន្តែអ្នកខ្លះបែរជាគាំទ្រទៅវិញ។
អ្នកលេងបណ្ដាញសង្គមហ្វេសប៊ុកម្នាក់ កញ្ញា លី ឡាយហ៊ុយ បានឃើញលិខិតកាត់កាល់លោកនាយករដ្ឋមន្ត្រី ហ៊ុន សែន ដែលគេបង្ហោះតៗគ្នានៅក្នុងបណ្ដាញសង្គម។ លិខិតនោះបានសរសេរជាលក្ខណៈឌឺដង ដោយហាក់ភ្ជាប់ទៅនឹងស្ថានភាពកម្ពុជាជាក់ស្ដែង ដែលបានខ្ចីលុយយ៉ាងច្រើនសន្ធឹកសន្ធាប់ពីសហគមន៍អន្តរជាតិ ក្រោមការដឹកនាំរបស់លោកនាយករដ្ឋមន្ត្រី ហ៊ុន សែន៖ «គឺគាត់លែងយកនាយករដ្ឋមន្រ្តី ធ្វើជានាយករដ្ឋមន្រ្តីរបស់គាត់ទៀតហើយ គឺគាត់លែងទទួលស្គាល់តែម្ដង។ អ៊ីចឹងហើយ នាយករដ្ឋមន្ត្រីយើងរាល់ថ្ងៃធ្វើអីទៀត ពួកគាត់លែងទទួលស្គាល់ហើយ។ គាត់ថានាយករដ្ឋមន្រ្តីទៅខ្ជីលុយពី ស្រុកណា ពីប្រទេសណា គាត់អត់អាចទទួលខុសត្រូវថាថ្ងៃក្រោយ កម្ពុជាអ្នកសង ដូច្នេះគាត់អត់ចូលរួមទទួលសង ព្រោះគាត់បានកាត់កាលចោលហើយ»។
យុវជនកម្ពុជាជាច្រើនដែលសកម្មនៅក្នុងបណ្ដាញសង្គមហ្វេសប៊ុក (Facebook) បានបង្ហាញពីភាពក្លាហានរបស់ខ្លួន សរសេរពាក្យរិះគន់ស្រដៀងៗគ្នា លើរដ្ឋាភិបាលកម្ពុជាបច្ចុប្បន្នដោយពួកគេមិនខ្លាចអំពីការចាប់ចង ឬគ្រាន់តែនិយាយអ្វីដែលចង់ឲ្យមានកែប្រែនោះទេ។
ក្រុមយុវជនទាំងនោះបានទទួលស្គាល់ថាភាពភ័យខ្លាច បានជំរុញឲ្យប្រទេសកម្ពុជា រួមទាំងខ្លួនឯងផ្ទាល់ធ្លាក់ចូលនៅភាពគ្រោះថ្នាក់។
ដោយឡែកក្រុមយុវជនដែលធ្វើការងារនៅក្នុងសហភាពសហព័ន្ធយុវជនកម្ពុជា ដែលដឹកនាំដោយកូនប្រុសបង្កើតរបស់លោកនាយករដ្ឋមន្ត្រី ហ៊ុន សែន លោក ហ៊ុន ម៉ានី វិញអះអាងថាការរិះគន់នោះគឺទស្សនៈរបស់គេ ដែលក្រុមនោះចង់បង្អាក់ដល់ការងារអភិវឌ្ឍទៅវិញ។ សហភាពសហព័ន្ធយុវជនកម្ពុជា បានប្រមែប្រមូលយុវជនដោយរាប់តាំងពីអ្នកចម្រៀង សិល្បករ គ្រូពេទ្យ និងយុវជនជាច្រើនទៀតឲ្យចូលរួមក្នុងការងារមនុស្សធម៌នៅក្នុងសង្គម។
ប្រធានសហភាពសហព័ន្ធយុវជនកម្ពុជា លោក ហ៊ុន ម៉ានី បានបដិសេធចំពោះការធ្វើអត្ថាធិប្បាយអំពីបញ្ហានេះដោយលោកតម្រូវឲ្យសរសេរពាក្យស្នើសុំបទសម្ភាសដោយផ្ទាល់៖ «ខ្ញុំមិនផ្ដល់បទសម្ភាសតាមទូរស័ព្ទដូចអ៊ីចឹងទេបង! បើសិនជាមានការអី ចាំដាក់លិខិតផ្លូវការ ហើយយើងជួបទល់មុខគ្នាវិញ»។
ទោះជាយ៉ាងណាក៏ដោយតារាចម្រៀងដែលបានស្ម័គ្រចិត្តចូលនៅសហភាពសហព័ន្ធយុវជនកម្ពុជា លោក ករុណា ពេជ្រ បានឲ្យដឹងថាការរិះគន់នរណាម្នាក់ដោយប្រើសំដីអាក្រក់ ឲ្យមកធ្វើតាមយើងគិតនោះគឺជារឿងលំបាកបំផុត។ ក្នុងនាមលោកជាយុវជនមួយរូបគឺត្រូវបង្ហាញឲ្យគេដឹងថាបច្ចុប្បន្នតើយើងបានចូលរួមយ៉ាងដូចម្ដេចខ្លះដល់ការងារជួយសង្គម នៅពេលដែលប្រជាពលរដ្ឋកម្ពុជាមានទុក្ខលំបាក៖ «ខ្ញុំគ្រាន់តែចង់ជម្រាបថានេះ គឺជាសិទ្ធិបុគ្គលឆន្ទៈរបស់យុវជនរៀងៗខ្លួន យើងមិនបង្ខំនរណាម្នាក់ឲ្យមកតាមយើងបានទេ។ ហើយយើងក៏មិនអាចនឹងមានឱកាសភ្លាមៗ យកពាក្យសំដីប្រមាថ ជេរមើលងាយ ទៅលើអ្នកណាម្នាក់ហើយឲ្យអ្នកហ្នឹងមកតាមយើង ខ្ញុំថាវាមិនមែនបញ្ហាងាយស្រួលទេ»។
ប្រធានដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍នៃសកលវិទ្យាល័យភូមិន្ទភ្នំពេញ លោក សោម រតនា មានប្រសាសន៍ថាបច្ចុប្បន្នយុវជនបានចូលរួមក្នុងការងារនយោបាយ និងសង្គមកាន់តែច្រើនជាងមុខដោយសារបច្ចេកវិទ្យាទំនើប និងភាពរីកចម្រើននៃបណ្ដាញសង្គម។ លោកបញ្ជាក់ទៀតថាការរិះគន់ ដោយលើកយកការកាត់កាល់នាយករដ្ឋមន្ត្រីដោយបង្ហោះតៗគ្នានៅបណ្ដាញសង្គមហ្វេសប៊ុក គឺត្រូវមានការទទួលខុសត្រូវរបស់បុគ្គលនោះ៖ ខ្ញុំគិតថាលើសពីការបញ្ចេញមតិក្នុងករណីហ្នឹង ជាទូទៅជាគំនិតរបស់គាត់មែន ក៏ប៉ុន្តែជាការទទួលខុសត្រូវមួយផងដែរ»។
ប៉ុន្តែលោកនាយករដ្ឋមន្ត្រី ហ៊ុន សែន ធ្លាប់អះអាងថាការប្រើប្រាស់បណ្ដាញសង្គមហ្វេសប៊ុក ដោយខុសគោលដៅដូចជាការក្លែងបន្លំប្រភពឯកសារ ឬការជេរប្រមាថអាចប៉ះពាល់សង្គមកម្ពុជា។ លោក ហ៊ុន សែន បញ្ជាក់ថារាជរដ្ឋាភិបាលមិនមានផែនការបិទហ្វេសប៊ុកឡើយ តែលោកអំពាវកុំឲ្យយុវជនយកហ្វេសប៊ុកក្លាយជាឧបករណ៍ធ្វើឲ្យបំផ្លាញស្ថិរភាពសង្គម៖ «រាជរដ្ឋាភិបាលលើកទឹកចិត្តដល់ក្រុមយុវជន ដែលចេះប្រើបណ្ដាញហ្វេសប៊ុក ហើយល្បឿនឲ្យលឿនទៀតដើម្បីឲ្យពួកគេចែករំលែក និងទទួលព័ត៌មានថ្មីៗ យើងក៏អាចទាញយកព័ត៌មានពីហ្វេសប៊ុកដើម្បីប្រើជាផលប្រយោជន៍ដល់ប្រជាពលរដ្ឋរបស់យើងបានដែរ។ ហើយអ្នកផ្ដល់ព័ត៌មានក៏គួរផ្ដល់ឲ្យបានត្រឹមត្រូវសុក្រិតដែរ ប៉ុន្តែត្រឹមត្រូវ ឬមិនត្រឹមត្រូវ យើងខ្លួនឯងក៏ចេះចំរាញ់យកថា ត្រូវ ឬខុសកុំជឿវាទាំងអស់ តែជឿវាទាំងអស់ងាប់ហើយ»។
ប្រធានអង្គការកម្មវិធីធនធានយុវជន លោក ជាង សុខា មានប្រសាសន៍ថាបើធៀបនិងការបោះឆ្នោតអាណត្តមុនៗ យុវជនជាច្រើនរារែកក្នុងការជជែករឿងនយោបាយ ឬមិនហ៊ានរិះគន់ដល់រាជរដ្ឋាភិបាលឡើយ។ ប៉ុន្តែបច្ចុប្បន្នជាពិសេសការបោះឆ្នោតអាណត្តិទី ៥នេះ យុវជនបានចូលរួមដល់សកម្មភាពនយោបាយកាន់តែច្រើន ឬផ្ញើសារនយោបាយកាន់តែច្រើន នៅតាមបណ្ដាញសង្គម។ ទោះបីជាគុណភាពនៃការផ្ញើនោះនៅមានកម្រិតទាប ប៉ុន្តែសកម្មភាពនេះបង្ហាញថាភាពក្លាហានរបស់យុវជនមានកម្រិតខ្ពស់ជាងមុន៕
No comments:
Post a Comment