ពលរដ្ឋមកពី ៦ភូមិក្នុងស្រុកសំរោងទង ខេត្តកំពង់ស្ពឺ និងក្នុងស្រុកអង្គស្នួល ខេត្តកណ្ដាល បានធ្វើពិធីសមាជជ្រើសរើសក្រុមប្រឹក្សាភិបាលកំពូល នៃមូលនិធិសហគ្រិនកម្ពុជា នៅព្រឹកថ្ងៃទី១៤ ឧសភា។
មូលនិធិនេះ បង្កើតឡើងដើម្បីឲ្យប្រជាសហគមន៍សន្សំប្រាក់ និងអាចខ្ចីប្រាក់ក្នុងអត្រាការប្រាក់ទាប ដែលអាចជួយលើកកម្ពស់ជីវភាព និងផ្តល់ឱកាសឲ្យសហគមន៍បង្កើតអាជីវកម្មខ្នាតតូច ដោយមិនចាំបាច់ទៅខ្ចីបុលពីធនាគារ។
មូលនិធិសហគ្រិនកម្ពុជា បានប្រមូលប្រាក់សន្សំពីប្រជាសហគមន៍ក្នុងភូមិចំនួន៦ បាន ៧៦លានរៀល ដើម្បីត្រៀមឲ្យសមាជិកក្រុមសន្សំប្រាក់ខ្ចីប្រាក់ទាំងនោះ ទៅបង្កើតអាជីវកម្មខ្នាតតូចសម្រាប់ផ្គត់ផ្គង់គ្រួសារ។
ទីប្រឹក្សាបច្ចេកទេសនៃមូលនិធិសហគ្រិនកម្ពុជា លោក ធី រស្មី ឲ្យដឹងនៅថ្ងៃទី១៤ ឧសភា ថា ក្រុមសន្សំប្រាក់នៃមូលនិធិនេះ ចាប់ផ្ដើមឲ្យពលរដ្ឋក្នុងមូលដ្ឋានដាក់លុយសន្សំក្នុងមួយខែយ៉ាងតិច ៣ម៉ឺនរៀល។ លោកបន្តថា តាំងពីឆ្នាំ២០០៩ រហូតដល់ពេលនេះ មូលនិធិសន្សំប្រាក់របស់សហគមន៍នៅស្រុកសំរោងទង ខេត្តកំពង់ស្ពឺ និងក្នុងស្រុកអង្គស្នួល ខេត្តកណ្ដាល បានសន្សំប្រាក់ចំនួន ៧៦លានរៀល ហើយសមាជិកក្រុមនោះអាចដាក់ពាក្យខ្ចីប្រាក់បានចន្លោះពី ៣០ម៉ឺនរៀល ទៅ ១០លានរៀល ក្នុងអត្រាការប្រាក់ទាប។
លោក ធី រស្មី៖ «គោលបំណងដើម្បីពង្រឹងទុនសម្រាប់ពង្រឹងអាជីវកម្មខ្នាតតូចបំផុតនៅតាមភូមិផ្សេងៗ ក្នុងស្រុកសំរោងទង និងស្រុកអង្គស្នួល ដើម្បីឲ្យគាត់មានទុនស្ដារជីវភាព ក៏ដូចជាពង្រីកអាជីវកម្មខ្នាតតូចរបស់គាត់ ដូចជា លក់កាហ្វេ លក់គុយទាវ នំបញ្ចុក បបរ ធ្វើជាងជួសជុលទូរទស្សន៍ កាត់សក់ផ្សេងៗ។ ពួកគាត់ត្រូវការទុនដើម្បីពង្រឹង និងរកចំណូលបន្ថែមសម្រាប់ជីវភាពពួកគាត់។ ពួកគាត់ក៏មានសាមគ្គីភាពរឹងមាំក្នុងការជួយធុរៈគ្នា ទាំងផ្នែកហិរញ្ញវត្ថុ និងការសាមគ្គីគ្នាក្នុងមូលនិធិនេះដែរ»។
លោកបន្តថា សមាជិកក្រុមសន្សំប្រាក់អាចខ្ចីប្រាក់ស្រួលក្នុងមូលនិធិ ដោយមិនចាំបាច់ដាក់ប្លង់ដី ឬប្លង់ផ្ទះទៅបញ្ចាំ ដូចខ្ចីប្រាក់នៅធនាគារទេ។ មួយទៀត ពួកគេអាចទទួលបានការប្រាក់ខ្លះមកវិញពីប្រាក់កម្ចីទាំងនោះថែមទៀត។
សមាជិកក្រុមសន្សំប្រាក់នៃមូលនិធិសហគ្រិនកម្ពុជា លោកស្រី ជិន សុភា រស់នៅភូមិដំណាក់អំពិល ស្រុកអង្គស្នួល ខេត្តកណ្ដាល និយាយថា លោកស្រីមានប្រាក់ជាង ១លានរៀលក្នុងមូលនិធិប្រាក់សន្សំ។ លោកស្រីនៅមិនទាន់គិតគូរពីរឿងខ្ចីប្រាក់មូលនិធិយកទៅពង្រីកមុខរបរចិញ្ចឹមមាន់ ដែលលោកស្រីកំពុងចិញ្ចឹមសព្វថ្ងៃនៅឡើយទេ ដោយរង់ចាំប្រាក់សន្សំនោះបានច្រើនជាងនេះបន្តិច៖ «ជួយឲ្យបងប្អូនសហគមន៍ខ្ញុំបានខ្ចីដើមទុនរកស៊ី ហើយមានការរីកចម្រើន ពេលបានការប្រាក់មក គឺបានជួយដល់សហគមន៍ គឺវាផ្ទុយស្រឡះពីការខ្ចីប្រាក់អង្គការ (ធនាគារ)»។
អង្គការបណ្ដុះបណ្ដាលធនធានសហគមន៍ (OBCR) បានផ្ដួចផ្ដើមឲ្យប្រជាសហគមន៍ចងក្រងគ្នា បង្កើតមូលនិធិសហគ្រិនកម្ពុជា។ សព្វថ្ងៃនេះ ក្រុមមូលនិធិនេះមាន ៥ក្រុម ស្ថិតក្នុងខេត្តកំពង់ស្ពឺ និងខេត្តកណ្ដាល ដោយក្រុមនីមួយៗមានទិសដៅផ្សេងៗគ្នាតាមកិច្ចព្រមព្រៀងរវាងសមាជិកនីមួយៗ។ ក្រុមខ្លះមានទិសដៅវែងឆ្ងាយ ដោយរៀងរាល់ ៥ឆ្នាំទៅ ១០ឆ្នាំ ឲ្យមានការបង្កើនទុនក្នុងមូលនិធិ ហើយមានក្រុមខ្លះបង្កើតក្នុងរយៈពេលខ្លី ដោយសន្សំប្រាក់ ១ ទៅ ២ឆ្នាំ រួចនឹងចែកទុនគ្នាសម្រាប់រកស៊ីរៀងៗខ្លួន៕
No comments:
Post a Comment