ហាណូយ ៖ ក្រសួងឧស្សាហកម្ម និងពាណិជ្ជកម្មវៀតណាមបានឱ្យដឹងថា វិស័យដែលជាគន្លឹះនៅក្នុងការជំរុញការនាំចេញទំនិញឧស្សាហកម្មរួមមានផ្នែកវាយនភ័ណ្ឌ និងកាត់ដេរក៏ដូចជាផលិតផលធ្វើពីស្បែក និងស្បែកជើងមានអត្រាកើនឡើងខ្ពស់ក្នុងការនាំចេញនៅអំឡុងពេល៤ខែដើមឆ្នាំ២០១៤នេះ ។
ពីមួយឆ្នាំទៅមួយឆ្នាំក្រុមហ៊ុនវាយនភ័ណ្ឌនិងកាត់ដេរសម្លៀកបំពាក់បានទទួលផលពីការកើន ឡើងប្រមាណជា២០%នៅក្នុងតម្លៃទឹកប្រាក់នាំចេញ៥,៩ពាន់លានដុល្លារ ។ លោកLe Tien Truong អគ្គនាយកក្រុមហ៊ុនវាយនភ័ណ្ឌនិងកាត់ដេរសម្លៀកបំពាក់របស់វៀតណាមបានលើកឡើងថា មានសហគ្រាសមួយចំនួនបានបញ្ជានាំចេញរហូតដល់ត្រីមាសទី៣ ខាងមុខននេះ ហើយក៏មានមួយចំនួនទៀតបានចុះកិច្ចសន្យារហូតដល់ចុងឆ្នាំ២០១៤ ។ ចំណែកការបញ្ជាទិញសំខាន់ៗគឺមកពីទីផ្សារអន្តរជាតិដូចជា សហគមន៍អឺរ៉ុប កូរ៉េខាងត្បូង ជប៉ុននិងសហរដ្ឋអាមេរិក ។
តាមរបាយការណ៍របស់ក្រសួងពាណិជ្ជកម្មបានបង្ហាញថា ការនាំចេញស្បែកជើងរបស់វៀតណាមឈានដល់៧៣០លានដុល្លារ នៅក្នុងខែមេសា ដែលនាំមកនូវការលក់ដាច់បានជិត២,៩ពានលានដុល្លារក្នុងអំឡុងពេល៤ខែដំបូង នៃឆ្នាំ២០១៤ នេះ កើនឡើង២១,៩%ពីមួយឆ្នាំទៅមួយឆ្នាំ ។ រីឯការនាំចេញកាតាប,វ៉ាលី,ឆត្រ និងមួកបានកើនឡើង៨២១លានដុល្លារ ក្នុងអំឡុងពេលជាមួយគ្នានោះដែរ កើនឡើង៤៨%ធៀបនឹងអំឡុងពេលដូចគ្នាកាលពីឆ្នាំ២០១៣ ។ ដោយឡែកការទទួលបានកម្រៃពីការនាំចេញស្បែកជើងទៅទីផ្សារតាមទម្លាប់រួមមាន សហរដ្ឋអាមេរិក ជប៉ុនបែលហ្ស៊ិក អាល្លឺម៉ង់ និងបារាំង បានកើនឡើងនៅក្នុងអំឡុងខែមករា ដល់ខែមេសា ជាងនេះទៀតក៏ទទួលបានផលចំណេញយ៉ាងច្រើនសន្ធឹកសន្ធាប់ពីបណ្ដាប្រជាជាតិតូចៗមួយចំនួនទៀតផងដែរ ដូចជា ប្រទេសសីលី កើន៨០,៨៥% អីុស្រាអែ៊ល កើន១២០,៤១% ក្រិកកើន៧៨,២% និងប៉ូឡូញកើន១៦១,៧% ។
ទោះជាយ៉ាងណាក៏ដោយ សមាគមផលិតស្បែកជើងនិងផលិតផលធ្វើពីស្បែករបស់វៀតណាមបានអះអាងថា ផលិតផលស្បែកជើងនិងកាបូបរបស់ខ្លួនគឺជាអ្នកប្រកួតប្រជែងដ៏សំខាន់មួយនៅក្នុងទីផ្សារសហរដ្ឋអាមេរិក និងជប៉ុន ៕
No comments:
Post a Comment