លោកនាយករដ្ឋមន្ត្រី ហ៊ុន សែន បានដឹកនាំគណៈប្រតិភូជាន់ខ្ពស់ចាកចេញពីកម្ពុជា នៅព្រឹកថ្ងៃទី១៨ ឧសភា ដើម្បីទៅចូលរួមកិច្ចប្រជុំកំពូលលើកទី៤ នៃសន្និសីទអន្តរសកម្មភាព និងវិធានការកសាងទំនុកចិត្តនៅអាស៊ី នៅទីក្រុងសៀងហៃ សាធារណរដ្ឋប្រជាមានិតចិន។
តាមសេចក្ដីជូនដំណឹងរបស់ក្រសួងការបរទេស និងសហប្រតិបត្តិការអន្តរជាតិ ឲ្យដឹងថា ដំណើរទស្សនកិច្ចផ្លូវរដ្ឋនេះ គឺជាការតបតាមការអញ្ជើញពីលោក ស៊ី ជិនពីង (XI JINPING) ប្រធានាធិបតីសាធារណរដ្ឋប្រជាមានិតចិន។
កិច្ចប្រជុំកំពូលលើកទី៤ នៃសន្និសីទអន្តរសកម្មភាព និងវិធានការកសាងទំនុកចិត្តនៅអាស៊ី នឹងប្រព្រឹត្តទៅចាប់ពីថ្ងៃទី២០ ដល់ថ្ងៃទី២១ ខែឧសភា នៅទីក្រុងសៀងហៃ។ សន្និសីទនោះនឹងផ្តោតលើការពង្រឹងកិច្ចសន្ទនា ទំនុកចិត្ត ការសម្របសម្រួល និងរួមគ្នាកសាងទ្វីបអាស៊ីថ្មីមួយ ដោយមានសន្តិភាព ស្ថិរភាព និងកិច្ចសហប្រតិបត្តិការ។
តាមគម្រោងលោកនាយករដ្ឋមន្ត្រី ហ៊ុន សែន នឹងជួបជាមួយលោក ស៊ី ជិនពីង ដើម្បីជជែកគ្នាអំពីកិច្ចសហប្រតិបត្តិការទ្វេភាគីរវាងកម្ពុជានិងប្រទេសចិន៕
No comments:
Post a Comment