ការវិនិយោគដោយផ្ទាល់របស់បរទេសទៅក្នុងប្រទេសចិនបានកើនឡើងកាលពីខែមុន ស្របពេលក្រសួងពាណិជ្ជកម្មរបស់ចិនថ្លែងថា លទ្ធផលនេះបានឆ្លុះបញ្ជាំងឱ្យឃើញថា ក្រុមវិនិយោគិនជាច្រើនបានផ្តល់ទំនុកចិត្តយ៉ាងមុតមាំមកលើចិន បើទោះជាស្ថិតក្រោមការកែទម្រង់ក៏ដោយ ។
សេដ្ឋកិច្ចរបស់ចិននៅក្នុងខែមេសា បានកើនឡើង៣,៤% ធៀបនឹងឆ្នាំមុនស្មើនឹង៨,៧ពាន់លានដុល្លារ ដែលជាការធ្វើឱ្យប្រសើរឡើងវិញពីការធ្លាក់ចុះ១,៥% កាលពីខែមីនា ។ ចំណែកក្នុងរយៈពេល៤ខែដំបូងឆ្នាំ២០១៤នេះ ប្រទេសចិនបានទាក់ទាញវិនិយោគបរទេសគិតជាទឹកប្រាក់ស្មើនឹង៤០,៣ពាន់លានដុល្លារ កើនឡើង៥%ពីមួយឆ្នាំទៅមួយឆ្នាំ ។ លោក Zhou Hao អ្នកសេដ្ឋកិច្ចរបស់ធនាគារ ANZ (Australia & New Zealand Bank) បានលើកឡើងថា ខណៈពេលដែលកំណើនសេដ្ឋកិច្ចក្នុងត្រីមាសទី១របស់ចិន បានបន្ថយល្បឿន និងកំពុងកើនឡើងសន្សឹមៗ គឺក្រុមវិនិយោគិនបរទេសនៅតែជឿជាក់លើសេដ្ឋកិច្ចរបស់ចិន ខណៈដែលប្រទេសនេះនៅតែជាអ្នកដែលមានលក្ខណៈពិសេសជាងគេ ធៀបនឹងប្រទេសដទៃ ។ GDP របស់ចិនបានកើនឡើង៧,៤% នៅក្នុងអំឡុងខែមករា ដល់ខែមីនា ដែលតួលេខនេះជាកម្រិតយឺតបំផុតនៅក្នុងរយៈពេល១៨ខែនេះ ។
ដោយឡែកកាលពីពេលថ្មីៗនេះ រដ្ឋាភិបាលចិនបានរៀបចំគោលនយោបាយដើម្បីគាំទ្រកំណើនសេដ្ឋកិច្ច និងការបង្កើតការងារដល់ពលរដ្ឋចិន ។ ការវិនិយោគបរទេសមកលើវិស័យសេវាកម្មរបស់ចិន បានកើនឡើង១៩,១% ស្មើនឹងទឹកប្រាក់២២,៥ពាន់លានដុល្លារ នៅក្នុងរយៈពេល៤ខែដើមឆ្នាំ២០១៤ នេះ ។ រីឯវិស័យផលិតកម្មអូសទាញវិនិយោគិនបរទេសមានទំហំទឹកប្រាក់១៤,៥ពាន់លានដុល្លារ ធ្លាក់ចុះ១១,៤% ប្រចាំឆ្នាំ ។ នៅគ្រានោះដែរ ការវិនិយោគដោយផ្ទាល់ដែលសំដៅទៅក្រៅប្រទេសរបស់ចិនបានធ្លាក់ចុះ១២,៩% ស្មើនឹង២៥,៦ពាន់លានដុល្លារក្នុងអំឡុងពេល៤ខែដំបូងនេះ ៕
No comments:
Post a Comment