ម៉ានីល ៖ អាជ្ញាធរអភិវឌ្ឍន៍សេដ្ឋកិច្ចជាតិរបស់ហ្វ៊ីលីពីនបានឱ្យដឹងថា វិស័យសេដ្ឋកិច្ចរបស់ប្រទេសបានកើនឡើងលឿនជាងការរំពឹងទុកនៅក្នុងអំឡុងពេល៣ខែដំបូងនៃឆ្នាំ២០១៤ នេះ ។ ក្នុងនោះ GDP របស់ជាតិពង្រីកបាន៦,៥% ធៀបនឹងត្រីមាសទី៤ នៃឆ្នាំមុន និងកើនឡើង៧,៧% ធៀបនឹងត្រីមាសដំបូងនៃឆ្នាំ២០១៣ ។
លោក Arsenio Balisacan អគ្គនាយកគ្រប់គ្រងអាជ្ញាធរអភិវឌ្ឍន៍សេដ្ឋកិច្ចជាតិបានលើកហេតុផលជាអំណះអំណាងថា ការចំណាយរបស់រដ្ឋាភិបាលជាឧទាហរណ៍ស្រាប់ ខណៈដែលថវិកាចំណាយជាក់ស្តែងកើនឡើង១៤% នៅក្នុងអំឡុងត្រីមាសដំបូងនេះ គឺស្មើនឹង៣,៨៨ពាន់លានដុល្លារអាមេរិក ។ ចំណែកការនាំចេញទំនិញក្នុងខែមីនា ទទួលបាននូវកំណើនទ្វេដង គឺកើនឡើង១១,២% ស្មើនឹង៥,២ពាន់លានដុល្លារធៀបនឹងឆ្នាំមុននាំចេញបានត្រឹមតែ៤,៧ពាន់លានដុល្លារបុ៉ណ្ណោះ ។ ម្យ៉ាងទៀតនៅក្នុងអំឡុងពេលជាមួយគ្នានេះដែរ គេឃើញមានការគាំទ្រផ្នែកសេដ្ឋកិច្ចមួយកម្រិតទៀតប្រមាណជា៦% នៃការកើនឡើងចំនួនប្រាក់ដែលពលករនៅក្រៅប្រទេសផ្ញើមកមានចំនួន១,៩៩ពាន់លានដុល្លារពីបរិមាណ១,៨៨ពាន់លានដុល្លារកាលពីឆ្នាំមុន ។
លោក Balisacan បញ្ជាក់ថា «យើងមើលមិនឃើញពីសញ្ញាណាមួយដែលបង្ហាញវិស័យផលិតកម្មមានការបង្អង់ល្បឿនឡើយ» ។ ជាងនេះទៅទៀត ភាពខ្លាំងក្លាជាងមុននៃប្រាក់ប៉េសូរបស់ហ្វ៊ីលីពីន ក៏កំពុងតែគាំទ្រដំណើរការនៃកំណើនសេដ្ឋកិច្ចផងដែរក្នុងពេលរូបិយប័ណ្ណក្នុងស្រុកធ្វើឱ្យប្រាក់ដុល្លារចុះថោក ដែលនាំឱ្យមានការបញ្ជាទិញថាមពលច្រើននៅក្នុងឧស្សាហកម្មក្នុងស្រុកទៀតផង ៕
No comments:
Post a Comment